"Desizaun Prezidente Repúblika nian depende, tanba iha lei balun fó fulan ida, maibé estuda kona-ba sasán sira ne'e bele loron ida ou loron rua, bele oras, e depende ba Prezidente estuda bainhira to'o ona, nia fó sai. Portantu fó sai mak ita foin bele haree, tanba nia la determina loron ida ou loron rua, ne'ebé ita hein de'it bainhira mak fó sai", dehan Xefe Kaza Militar Prezidente Repúblika, António Soares da Silva "Mau Kalo" hafoin partisipa reuniaun Konsellu Superior Defeza no Seguransa ho PR Lú Olo iha Palasíu Prezidensiál Bairopite, kinta (27/01).
Tanba haree ba funsaun konsellu superior defeza no seguransa hanesan organ konsulta Prezidente Repúblika nian, kuandu organ konsulta ne'e, la'ós desizaun, maibé ne'e atubele analiza, estudu kona-ba asuntu saida mak trata hafoinfó hanoin.
Membru ida-idak fó ona ninia hanoin no hanoin hirak ne'e hotu fó ona ba Prezidente Repúblika, maibé kona-ba desizaun seidauk bele, tanba Prezidente rasik sei pronunsia.
"Tanba Prezidente husu tiha hanoin tenke hela ba nia, e depois nia tenke ba estudu, analiza depois mak nia fó hanoin, tanba ne'e mak reuniaun ohin pozitivu di'ak, maibé ita hein rezultadu saida de'it mak Prezidente fó karik, ita hein", Xefe Kaza Militar afirma.
Ba orgaun konsulta Prezidente Repúblika nian, hanoin hotu pozitivu ka vantazen, pozitivu no negativu ne'e Prezidente mak rona, maibé lei rasik la fó dalan atu deklara ba públiku.
"Lei bandu ida ne'e, tanba wainhira ita mak rona, ita politiza taun buat ne'ebé ema seluk nia kompeténsia ema politiza ko'alia fali buat seluk, tanba ne'e lei bandu ita la bele ko'alia sai saida de'it mak konsellu superior defeza e segurabsa reuni fó sira-nia hanoin", esplika nia.
Maibé opiniaun hotu ne'ebé konsellu superior defeza no segurabsa fó ona ba Prezidente Repúblika sei estuda hanoin hirak ne'e hodi deside desizaun ikus.
"Mensazen Prezidente Repúblika nian dehan katak, tuir prosedimentu legal kona-ba promosaun nomeasaun nian, liliu liga ba forsas armadas nian ne'e, nu'udar komandante supremu forsa armadas ita kumpri prosedimentu legal, sasán sira ne'e la'o hotu ona, prontu hela Prezidente Repúblika nia kompeténsia atu fó sai ikus”, haktenik nia. (*)
