"Sim durante ámbitu selebrasaun loron Natál, 24 to’o 25 fulan-dezembru, ita prende viatura Estadu ka transporte Governu hamutuk lima (5), kompostu husi karreta rua (2) no motorizada tolu (3). Atividade apreensaun ne’e bazeia ba lei númeru 08/2003, kona-ba utilizasaun transporte Estadu nian. Nune’e, Polísia Tránzitu hanesan fiskalizadór, iha kna’ar hodi kontrola sirkulasaun karreta ho motorizada Estadu nian, bainhira sirkula la tuir oras servisu”, dehan João Belo, iha Komandu Jerál Kaikoli, kinta (30/12).

Evidénsia sira ne’ebé prende ona, daudaun destaka hela iha Tránzitu Nasionál, liliu Komandu PNTL Kaikoli, Díli, hodi hein koordenasaun ho parte Komisaun Anti Korrupsaun (KAK), Comissão da Função Pública (CFP), Patrimóniu Estadu, nomós Diresaun Nasionál Transportes Terrestre (DNTT), atu oinsá mak prosesu sira ba oin.

Aleinde ne'e mós, hahú husi-Janeiru to’o loron 26 fulan-dezembru, departamentu Tránzitu no Seguransa Rodoviária, rejista totál asidente tráfegu hamutuk 1.418, kanek kaman hamutuk 1.528,kanek todan  hamutuk 311,no na’in-56 seluk lakon sira-nia vida.

Nune'e halo komparasaun dadus asidente tráfegu sira ne’ebé akontese antes iha tinan sira kotuk, númeru ema mate iha Estrada, hahú husi na’in-60 to’o na’in-100, no ida ne’e aas liu. Maibé, iha tinan 2021 ne’e, dadus asidente ne’ebé rezulta ema mate to’o de’it 56.

"Husi dadus ida ne’e, hatudu katak, Komandu PNTL liuhusi Tránzitu no Seguransa Rodoviária, konsege redús ona númeru asidente fatál iha estrada, hein katak, hahú loron 30 fulan-dezembru ba oin, sei la akontese tán asidente fatál iha estrada públiku sira”, dehan nia. (*)