"Forsas armada hanesan uluk ha'u dehan, tinan ba tinan ne'e nesessidade sempre aumenta, entaun Governu tenke dispoin orsamentu ida ne'ebé tenke koresponde ba nesessidade forsa armada ninian. Pelu kontrariu Governu la halo ida ne'e invés de orsamentu forsa armada desorsamenta, por ezemplu ema atu komprende didi'ak, se orsamentu 2021 tinan ida ne'e  20 milhões ka 30 milhões entaun 2022 labele 20 milhões nafatin tenke aumenta tanba nesessidade aumenta", dehan Lere hafoin hasoru malu ho PR Lú Olo iha Palasíu Prezidensiál Bairopite, kuarta (29/12).

Ho ida ne’e, tenke iha boa vontade polítika atu dezenvolve forsa armada, tanba tinan ida ne'e aumenta tan efetivu mais 600 pesoál, tinan oin aumenta 600 pesoál, bainhira númeru efetivu nesesidade mós aumenta, nesesidade infraestrutura, transporte no lojistika sira ne'e tenke aumenta.

"Governu mós tenke preokupa ida ne'e, labele hanesan foin dadauk tinan 2022 ne'e, orsamentu ida ne'ebé ha'u la konkorda tanba aumenta efetivu nesesidade mós aumenta hanesan ohin ha'u dehan, tanba forsa armada la'ós animal, fahi ne'e mak kuandu háhoris lima tenke aumenta hahán ba lima kuandu sanulu aumenta lae, forsa armada ne'e ema, sira presiza moris hodi halo atividade loroloron nu'udar militar e militar ida ne'ebé profesionál e kredível , porque hanesan ohin ha'u dehan militar ne'e ema ida ke ema, estadu ninia ema", afirma nia. 

Alende ne’e, Estadu nia ema nia mós iha famílias entaun nia servi Estadu, servi nia família, ema ida ne’ebé moral forte atubele hala'o nia servisu, ne'e mak Governu tenke hanoin didi'ak.

"Sé mak tinan oin mai ukun mós fó proriedade ba forsa armada no polísia, tanba instituisaun rua ne'e importante liu ba estabilidade nasionál, ita Timor presiza estabilidade e konfiansa, porque estabilidade laiha ema investor sira laiha konfiansa atu mai e buat barak ne'ebé ita-nia polítika sira tenke halo para ita bele dezenvolve ita-nia rai", hatete nia.

Enktuantu dezafiu ne'e tenke iha orsamentu atubele rezolve desafiu, tanba  forsa armada tenke operasionál, prontu durante 24 oras, por erzmplu laiha karreta, nia labele operasaun 24 oras se laiha botas labele operasaun 24 oras, entaun atu opesionaliza ka halo forsa armada operasaun tenke iha kondisaun meius, 

"Por exemplu karreta ne'ebé Malazia fó iha 2002 ka 2003, ne'e ohin loron ha'u bandu la la'o ona, porque ne'e estraga de'it ema nia vida, entaun Governu tenke kria fali foun, karreta ne'e la'ós ita bele dehan katak, karreta ki’ik vidru metan ida ne'e de'it la serve, ita presiza karreta operasionál e karreta lojístika nia mós tenke iha", hatete Lere.

Problema hirak ne’e la'ós foun tanba, Ministru Defesa la'ós ema foun Ministru Defesa, maibé uluk komandu forsa husi 2001 to'o 2018, hafoin Ministru Defesa, ne'ebé la presiza halo relatóriu mós ministru defesa hatene.

"Ministru Defeza mak tenke defende iha Konsellu Ministru, konsellu ministru hatete ba Primeiru Ministru, forsa armada presiza ida ne'e, ida ne'ebá, se laiha osan, dehan laiha osan, se iha osan ba sosa, ha'u la fiar katak laiha osan. Orsamentu tinatinan billaun ne'e la'ós oituan, rihun-atus-ida mak dála sanulu kedas ne'e la'ós oituan hatene jere", refirma nia.

Entretantu, Proposta-lei Orsamentu Jerál Estadu (OJE) 2022 ho montante inisial millaun US$1,761.642 ne'ebè aloka ba Ministériu Defeza (MD), Parlamentu Nasionál deside aumenta tan Millaun US$7,5 tuir proposta adisionál ne'ebè mak aprezenta husi Komisaun B trata asuntu defeza no seguransa.

Proposta adisionál millaun US$7,5 ne'e hetan aprovasaun ho votu a-favór 50, kontra 0 no abstensaun 14.

“Ho nune'e, Orsamentu Jerál Estadu ba Ministéiru Defeza ho nia alterasaun proposta sira ne'e pasa,” dehan Prezidente Parlamentu Nasionál (PN), Aniceto Longuinhos Guterres Lopes, iha plenária PN, segunda (13/12).

Purtantu Proposta númeru 155 títulu MD, kategória despeza kapitál menór progama ho kódiku 388 defeza nasionál dotasaun inisiál US$1,761.642 ho alterasaun aumenta millaun US$2, nune’e dotasaun finál US$3,761,642. (*)