Vise-Ministru Interior (MI), Antonio Armindo iha inaugurasaun ne’e hatete, konstrusaun Postu foun ne’e iha kolaborasaun di’ak ho nasaun parseria sira husi Guvernu Austrália liuhusi TLPDP.
Bainhira simu mandatu planu prioridade Ministériu Interior nian mak infraestrutura PNTL nian, no tuir orientasaun Ministru Interior Mak hamutuk ho ekipa tékniku sira hahú la’o kedas husi Mota-Ain ba to’o Suai no RAEOA halo observasaun hodi mellora seguransa iha fronteira oinsá mak bele proteje di’ak nasaun nia soberania.
“Ha’u haree kondisaun fasilidade no kuantidade membru UPF no Unidade Polísia Marítima (UPM) iha fronteira menus tebes tanba ne’e Guvernu hanoin katak molok aumenta kuantidade ita haree uluk kondisaun infraestrutura no fasilidade uluk lai. Entaun Ministériu Interior halo lobi ho parseria TLPDP hahú konstrui uluk postu 6 ba UPF no UPM ne’ebé antes ne’e ita-nia Primeiru Ministru mak halo uluk ona inaugurasaun simbolikamente ba postu UPF iha Wefauk no Postu UPM iha Akrema”, dehan Vise-MI Antonio Armindo, iha nia diskursu bainhira Inagura Postu UPF Sukaer Midar, tersa,(21/12).
Hafoin mosu Covid-19 iha tinan rua kotuk Guvernu nia preokupasaun maka’as mak fronteira la protejidu tanba iha infiltarasaun Ilegál maka’as nune’e buka parseria hodi kontinua tulun Governu ba haforsa seguransa iha fronteira Timor-Leste.
“Ho Covid-19 ne’ebé mosu, Guvernu hanoin katak ita tenke ho urjente hadi’a ita-nia fronteira hodi aumenta tan postu hamutuk 13 ne’ebé orsamentu mai husi fundu Covid-19 nian maibé osan ne’e lato’o no TLPDP apoiu tan ita osan rihun-atus-ida-limanulu-resin-lima hodi kompleta no tékniku sira husi kompaña Caltech mak konstrui no ohin ita mai iha ne’e hodi inaugura simbolikamente postu UPF Sukaer Midar husi postu 13 ne’ebé oras ne’e hala’o hela no ita-nia tarjetu sei remata iha inisiu fulan-juñu tinan oin”, informa nia.
Nune'e kongratula mós kooperasaun di’ak entre Timor-Leste ho Guvernu Austrália ba konstrusaun postu foun 13 ne’ebé halo ho apoiu balu husi parseria permanente PNTL-TLPDP.
Komandante TLPDP, Superintendente Darren Booy, hato’o agradesimentu ba Guvernu liuhusi Ministériu Interior no PNTL ne’ebé halo ona kooperasaun servisu durante ne’e ba dezenvolvimentu PNTL ne’ebé la’o di’ak to’o ohin loron.
“Ohin ita hamutuk asiste inaugurasaun postu foun ba UPF tanba ne’e hakarak hato’o gratidaun ba kooperasaun no amizade ne’ebé mak hatudu ona husi Vise-Ministru Interior no Komandu Jerál PNTL nomós estrutura tomak ne’ebé iha komitmentu hodi hametin seguransa fronteira no ida ne’e importante tebes ba nasaun atu ptoteje territóriu l nasional hodi kombate tráfiku umanu, kontrabandu migrante no forma sira seluk krime organizadu transnasionál nian”, deklara Darren Booy.
TLPDP sei nafatin fó apoiu ba PNTL bazeia ba programa prioridade ne’ebé trasa ona iha futuru nune’e PNTL bele sai profesionál liután.
Komandante Jerál (Komjer) PNTL, Komisariu Faustino da Costa hatete, kontrolu ne’e la’ós responsabilidade UPF nian de’it, maibé responsabilidade sidadaun hothotu nian, hodi asegura moris hakmatek.
“Situasaun iha fronteira ejize responsabilidade autoridade seguransa nian hodi mantein fronteira sai fatin seguru ba ema hotu maibé ema hotu nia kontribuisaun mós ezije servisu hamutuk hodi tau matan kolabora mós ho autoridade lokál no komunidade sira iha fronteira”, deklara nia
Daudaun ne’e Komandu dezeña ona programa jestaun fronteira nian ne’ebé envolve PNTL no F-FDTL hamutuk ho komunidade servisu hamutuk hodi garante fronteira sai fatin seguru ba ema hotu.
“Wainhira komunidade nia animal ruma hakat liu fronteira presiza informa hodi koordena ho autoridade la’ós ho asaun ho atus ne’ebé ita la espera tanba ne’e kontribuisaun komunidade iha área fronteira sai mós fator determinante ba fronteita ne’ebé seguru maibé wainhira komunidade iha kooperasaun di’ak mak sei lamosu konfltu ka problema no la’ós de’it iha Balibo maibé iha mós fatin fronteira seluk”, hatete nia.(*)
