Hafoin akontesimentu tuda malu ne'e, Polísia Nasional Timor-Leste (PNTL) eskuadra Bekora mós konsege tun ba hodi hakalma no asegura mós autór balun iha terenu.

Diretór Ensinu Sekundáriu Jerál (ESJ) 5 de Maio, Manuel Verdial deklara, mosu duni movimentu boot entre estudante husi eskola rua ne'e, maibé sira lahatene motivu husi insidente ne'e saida.

"Ha'u seidauk hatene loloos motivu ne'e, iha duni movimentu boot oituan iha eskola rua ne'e, ami labele ko’alia ida ne’ebé mak sala e ida ne’ebé mak loos. Maibé ohin iha ona indikasaun ruma ba autór sira ne’ebé book-an uluk hodi halo provokasaun”, hatete nia ba www.tempotimor.com liuhusi telefone, sábadu (27/11).

Iha situasaun ne'e, polísia sira mós kontrola la di’ak tanba estudante balun kontinuasaun tuda malu,  hodi kona fali komunidade, nomós ema sira ne’ebé movimentu ho motorizada liuhusi dalan.

Mesmu nune'e, polísia sira agora halo hela movimentu iha eskola rua ne'e, hodi haree oriariu ezame segundu turnu ne'e.

Purtantu iha akontesimentu ne'e, parte Diretór ESJ 12 novembru mós informa katak, sira-nia profesór ida inklui mós alunu (estudante) ida mak hetan kanek.

"Maibé temi de’it liafuan mak kanek e ami seidauk haree ho matan, kanek ne'e oinsá. Maibé buat sira ne'e hotu sei liuhusi PNTL eskuadra Bekora, atubele hatene no identifika motivu situasaun ida ne'e nomós ema hifa mak kanek”, esplika nia.

Enkuantu profesór no estudante iha ESJ 5 de maio, laiha ida mak kanek tanba Diretór ho profesór sira halo esforsu direta hodi hases estudante sira bainhira estudante 12 novembru kontinua tuda mai. (*)