Komandante PNTL Munisipiu Dili, Superintendente Xefe Henrique da Costa hatete, bainhira konfrontu mosu, PNTL hetan kedas informasaun, nune'e komandu Dili orienta kedas ekipa patrollamentu Kristu Rei no mós forsa reserva tun direita hodi halo atuasaun kedas iha fatin akontesimentu.
“Bainhira ita rona informasaun, ita orienta kedas ita-nia ekipa eskuadra Kristu Rei inklui forsa rezerva hodi halo atuasaun kedas no ita kaptura ema na’in-5 husi Grupu Arte Marsiál rua, 77 no PSHT, no oras ne'e ita-nia parte investigasaun sei kontinua hela”, dehan Komandante Henrique, iha Kaikoli, tersa (12/07).
Tanba grupu rua ne'e ho membru ne’ebé barak mak ekipa patrollamentu lansa gas ba sira ne’ebé konfrontu hafoin bele kaptura suspeitu na’in-5 lori ba eskuadra Kristu Rei hodi halo prosesu investigasaun.
Iha akontesementu ne'e laiha ema ida mak mate ka kanek, maibé iha investigasaun identifika asaun ne’e grupu rua konsege tuda malu duni.
“Motivu husi problema ne’e, ita-nia parte investigasaun kristu rei sei buka tuir hela hodi hatene los motivu husi problema ne’e tanba saida, maibé ita hetene katak kuandu envolve ona Grupu Arte Marsiál ne'e ba ona iha sira-nia kompétisaun, katak ida-ne’e mak maka’as liu no hanesan ne’e mak mosu konfrontasaun iha-ne’e”, afirma nia.
Tanba dala ruma iha problema seluk ne’ebé sira tenta dada fila ba grupu nian, nune’e parte investigaaun sei kontinua hela nia prosesu, no parte informasaun mós sei buka hela motivu lolos husi konfrontu ne’e.
“Autór sira ne’e, banhira ita halo atuasaun ne’e ita foti kedas iha ne’eba, sira na’in-lima ne’e ita la bele fó sai sira-nia naran tanba sei iha hela prosesu nia laran”, hatete nia.
Ba fatin konfrontu ne’e sai ona atensaun ba parte patrollamentu nian, iha munisípiu Dili liliu eskuadra kristu rei nomós forsa reserva no servisu informasaun nian, atu halo movimentu hodi prevene problema kontinuasaun. (*)