Kontra Konfinamentu Domisiliáriu, PNTL Kaptura Sidadaun Na'in-50

PNTL Munisípiu Dili halo identifikasaun ba sidadaun hamutuk na'in-50 ne'ebé kaptura iha área Manleuana. PNTL Munisípiu Dili halo identifikasaun ba sidadaun hamutuk na'in-50 ne'ebé kaptura iha área Manleuana. Foto Suplay

Tempotimor (Dili)-Polísia Nasionál Timor-Leste (PNTL) liuhusi Komandu Munisípiu Dili kaptura sidadaun hamutuk na'in-50 iha área Manleuana, tanba halo atividade prodúz batako iha tempu Konfinamentu Domisiliáriu Jerál hodi kontra rezoluasaun Governu.

Sidadaun na'in-50 ne'e, kompostu husi timoroan na'in-46, no estranjeiru na'in-4, ne'ebé PNTL kaptura iha loron kinta (02/09) horisehik, iha área Manleuana, Postu Administrativu Dom Aleixo, Munisípiu Dili.

"Horisehik (02/09), ekipa patrulla konjunta, halo operasaun ba loja sira ne'ebé mak loke nomós kompaña hirak ne'ebé mak halo hela atividade. Ita ba área parte Dom Aleixo nian, iha fatin rua, e ita-nia patrulla konjunta kaptura no bolu ema hirak ne'ebé halo hela servisu iha ne'ebá ne'e, lori mai edifísiu hodi halo identifikasaun. Ema hamutuk na'in-50, ne'ebé mak na'in-4 ne'e, sidadaun estranjeiru. Sira halo hela batako, sira halo hela servisu konstrusaun ninian, iha área Manleuana nian", haktuir Komandante PNTL Munisípiu Dili, Superintendente Henrique da Costa, sesta (03/09).

Maske nune'e, sidadaun sira ne'e, PNTL bolu ba halo de'it identifikasan, hafoin haruka fila ba ida-idak nia hela fatin, tanba kondisaun sela detensaun munisípiu Dili nian kloot, nune'e labele detein.

"Depois de mai halo identifikasaun, ema hirak ne'e ita haruka filafali ba ida-idak nia fatin, e ita fó hanoin ba sira atu nune'e labele kontinua ka labele repete tan filafali hodi loke loja ka halo sira-nia atividade ne'ebé mak kontra rezolusaun Governu númeru 115/2021, loron 26 fulan-Agostu nian", esplika nia.

Razaun PNTL halo kapturasaun, tanba Konfinamentu Domisiliáriu Jerál (lockdown), ne'ebé aplika iha Dili, katak, sidadaun hotu hela hakmatek iha uma, no sira ne'ebé bainhira iha nesesidade urjénsia ruma.

"Sai ne'e, ba hanesan nesesidade importante sira, ba Ospitál, Tribunál, Polísia ka ba sosa ai-hán ruma. Mais ida ne'e halibur malu atu nune'e halo fali servisu ne'ebé mak urjente, importante iha situasaun ida agora", afirma nia.

Nune'e, sidadaun sira komete duni krime dezobediénsia ba regra ne'ebé Governu impoin iha konfinamentu, ho rezolusaun Governu númeru 115/2021, iha loron 26 fulan-Agostu ne'e.

Operasaun konjunta ne'e, hala'o husi Eskuadra Dom Aleixo, Komandu Munisípiu Dili, Forsa Rezerva, Servisu Investigasaun ho Tránzitu sira. (*)

Rate this item
(0 votes)
Last modified on Friday, 03 September 2021 15:44
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« October 2021 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter