“Iha oras tuku lima loraik ne’e ita asegura sidadaun SJ no prende mós kilat-anin lolon 1 ho marka AESE 92 hamutuk ho nia na'in iha área Postu Administrativu Tilomar, tanba sidadaun ne’e kontra ona lei númeru 5/2017 kona-ba arma branka nian”, dehan Komandante UPF, Superintendente Euclides Belo, liuhusi karta komunikadu ne'ebé www.tempotimor.com asesu, domingu (05/09).

Hafoin kapturasaun, membru UPF sira halo kedas identifikasaun no entrega ona sidadaun ne’e hamutuk ho objetu ne’ebé prende ba Komandu PNTL Munisípiu Covalima hodi halo prosesu investigasaun hodi prosesa tuir lei.

“Ohin (05/09) madrugada tuku 6 dader ne’e mós ami halo mós aprensaun ba sidadaun feto ida ho naran inisiál SnR ho motorizada tula mós nia oan sei ki’ik tanba lori tabaku sek bantal hamutuk 9”, informa nia.

Dezde sábadu (04/09) horisehik, to’o domingu (05/09), UPF kompaña Bravo Covalima servisu koletivu halo nafatin patrulla kalan no loron hodi kontrola liña fronteira hodi haree sidadaun sira ne’ebé tama ilegál inklui sira ne’ebé halo transaksaun ilegál.

Antes ne'e, TNI (Tentara Nasional Indonézia) prende ona kilat-anin hamutuk lolon 100, ne'ebé durante sidadaun sira uza ho ilegál lao haleu iha área fronteira terrestre entre Timor-Leste no Indonézia. (*)