“Ba ohin dadeersan dia 17 de Agosto 2021, Portavóz Polísia Nasionál Timor-Leste hakarak fó informasaun balu ba komunidade sira atubele hatene. Primeiru, hakarak atu hatete de'it katak iha dia 09 to'o 17 ohin, iha asidente hamutuk 20 ne'ebé mak ho nia tipu insidente ne'e katak (la hanesan)”, informa Portavóz Komandu Jerál PNTL, Superintendente, Arnaldo de Araújo, iha Kaikoli, tersa (17/08).
Kazu hirak ne'e, kompostu husi, karreta soke malu 3, motorizada ho motorizada iha 2, karreta ho motorizada 4, karreta ho motorizada monu rasik iha kazu 7, no soke ema la'o ain iha kazu 4, ne'ebé akontese iha territóriu nasionál.
“Ne'e mak totál hamutuk 20, ho nia tipu sira ne'ebé mak ohin ha'u hatete ona. Kanek kaman 28, kanek todan 1, mate 1 iha Lautein-Lospalos", hatenik nia.
Iha kazu insidénte hamutuk 2, hahú husi loron 9 to'o 17, ida asaltu malu, segundu ahi-hán uma, ne'ebé akontese iha Baukau, no agora dadauk prosesu la'o hela. (*)
