Tempotimor (Dili)-Komandu Polísia Nasioná Timor-Leste (PNTL) rejísta kazu asidente trafegu hamutuk 20, ne'ebé akontese durante semana ida, husi loron 09 to'o 17 fulan-Agostu tinan 2021, no na'in ida mak lakon vida (mate, iha Munisipiu Lautein).

Tempotimor (Dili)-Polísia Nasionál Timor-Leste (PNTL) liuhusi Polisia Nasional Servisu Investigasaun Kriminál (PNSIK) detein ona suspeitu ho inisiál SJ iha sela detensaun Komandu Jerál PNTL Kaikoli, tanba asalta membru seguransa na'in rua iha área Formoza, Suku Gricenfor, Postu Administrativu Nain-Feto, Munisípiu Dili.

Vítima na'in-rua ne'e, ida mak Natalino Soares, servisu iha informasaun Polísia Militár, maibé hetan kanek iha kotuk laran, no vítima Manuel Tilman Martins, servisu nu'udár Guarda Prizional iha Prizaun Bekora, kanek iha hasan sorin loos.

“Agora dadauk PNSIK halo hela detensaun iha fraglante-de-litu ba suspeitu na'in-rua, ho NUC 0180/21 PNSIK, hodi hein aprezenta ba Tribunál Distrirál de Dili, hodi submete ba prosesu primeiru interrogatóriu, antes 72 oras”, informa Portavóz Komandu Jerál PNTL, Superintendente, Arnaldo de Araújo, iha Kaikoli, tersa (17/08).

Insidente ne'e, mosu iha loron domingu (15/08), maizumenus tuku 02:55 madrugada, iha área Formoza, Suku Gricenfor, Postu Administrativu Na'in Feto, Munisípiu Dili.

Durante insidente, suspeitu AM atu halai subar-an, maibé tanba hetan apoia husi juventude sira balu ne'ebé partisipa mós iha eventu refere, hodi kaer kedas, enkuantu ho inisiál SJ, konsege halai husi lokál krime no konsege kaptura filafali iha área Palásiu Governu nia oin.

“Suspeitu ho inisiál SJ, mós deskonfia antes ne'e, asalta uluk ona vítima Guerson Yang, nu'udár membru PNTL, servisu iha UPF (Unidade Patrullamentu Fronteira) iha área Timor Top Metiaut, Postu Administrativu Cristo Rei, Munisípiu Dili, ne'ebé mak akontese iha 18 de Jullu 2021, ho NUC 0158/21, no suspeitu refere komete mós kazu violasaun seksual númeru NUC 0447/18”, hatete nia. (*)