Antes ne’e PNTL aviza on aba públiku liuhusi notísia ne’ebé públika husi mídia hodi halo pasa revista iha fatin sanulu (10), maibé adeptu sira jogu Kopa Euro 2020 kontinua halo kombiu no kontra kódigu  estrada.

Aprensaun ba motorizada hirak ne'e, liuhusi atividade pasa revista ne'ebé hala'o iha loron kuarta (23/06), maizumenus tuku 16:00 to’o loron kinta (24/06) madrugada. 

“Ekipa konjunta apoiu husi komandu jerál nian, ita hala'o pasa revista ba movimentu transporte iha kapitál Dili ita estabelese iha fatin 10 ne'ebé mak rezultadu husi pasa revista sira ne'e, ita rekolla evidénsia motorizada hamutuk 149 ne'ebé mak hahú husi tuku haat lorokraik, to'o iha dadeersan ninian”, informa Komandante PNTL munisipiu Dili, Superintendente Xefe Polísia, Henrique da Costa iha kna'ar-fatin Kaikoli, kinta (24/06).

Durante halo pasa revista, sira observa katak, adeptu barak mak komesa iha ona konsiénsia, tanba kompara ho loron hiran antes, iha joven barak mak ho motoriza halai tun-sa'e iha sidade laran

“Buat ne'ebé ita apresia tanba mezmu que balu konsege sai duni ho motorizada para halo barullu, maibé ita la rezulta hanesan semana kotuk ne'ebé mak tuda ema nia uma rahun ka estraga ema nia sasán ne'e laiha”, dehan nia.

Entretantu, infratór ne'ebé adeptu sira komete balu laiha xapa matrikula, laiha asesor sira seluk hanesan espellu, kapasete, no balu laiha dokumentu.

“Entaun ita lori mai (komandu Dili) para hodi halo prosesu hodi passa billete ba sira, atu nune'e sira bele ba selu iha banku, depois mak mai foti sira-nia motorizada ne'ebé mak ita prende”, hatete nia. (*)