“Ita identifika ona ema balu, e ita-nia parte Ofisial Polísia Suku (OPS) ho Konsellu Polisliamentu Komunitáriu (KPK) sira identifika ona, e ita sei bolu mai para halo identifikasaun ba ema na'in-3, depois sira na’in-tolu (3) ne'e mak ita sei buka tan, keta grupu barak tan karik”, informa Komandante PNTL munisípiu Dili, Superintendente Xefe Polísia, Henrique da Costa, iha kna'ar-fatin Kaikoli, kinta (24/06).
PNTL munisípiu Dili simu ona keixa husi Padre sira hodi identifika no kontinua buka tuir suspeitu sira ne'ebé envolve insidente iha área Kuluhun.
“Ita iha poder atu bolu sidadaun sé de'it mai para halo identifikasaun, maibé kaptura ita seidauk bele tama ba ne'ebá, tanba ita seidauk. Buat ne'e la'o tuir prosesu no sei halo auto-notísia ba Ministériu Públiku (MP)”, dekla nia.
Entretantu, kazu tuda rahun rezidénsia ka konventu padre sira-nian ne'e, akontese iha loron sábadu (19/06) semana kotuk, oras madrugada, husi adeptu sira, hafoin asiste jogu entre nasaun Portugal ho Alemaña iha Kopa Euro. (*)
