Insidente ne’ebé mosu husi joven adeptu balu ne'ebé sunu bandeira nasaun Portugal nian, hafoin asiste jogu Kopa Euro 2020 iha loron (28/06), tuku 04:00, madrugada.
“Ida ne'e, ita hanoin dehan katak ida ne'e kríme, ne'e kestaun soberania nasaun ida ninian. Hanesa ezemplu, sé embaixada nasaun seluk iha ita-nia rai ne'e, ne'e reprezenta ninia nasaun. Por ezemplu dala-ida, Lito Rambo ba asaltu embaixada, ne'e kríme boot ida. Ema tiru mate iha ne'ebá mós di'ak, laiha problema. Agora, ó sunu ema nia bandeira, ne'e ema nia soberania”, hatete Lere iha Kuartel Jenerál, Fatuhada, segunda (28/06).
Ho ida ne’e husu ba komansu PNTL tenke toma responasábilidade, tanba relasaun entre nasaun amigu Portugal ho Timor-Leste di'ak tebes.
“Mais, ha'u hanoin katak sunu bandeira ne'e labele. Ita-nia bandeira mak iha nasaun seluk ema sunu mós, ita sempre foti kestaun, tanba ne'e kestaun soberanea. Ita-nia bandeira ita sosa ho rán”, afirma nia.
Entretantu, Portavóz Komandu Jerál Polísia Nasional Timor-Leste (PNTL), Superintendente Xefe Polísia, Arnaldo de Araújo deklara, komandu munisípiu Dili sei halo hela indentifikasaun ba suspeitu sira, bainhira identifika ona, sei prosesa tuir lei ne'ebé vigora. (*)