"Ita mós iha problema ida kona-ba eletrisidade, horibainhira ahi mós mate, e ita labele halo servisu. Tanba ne'e mak ita mós ko’alia ho sira (TLPDP) para sira hodi hadi'a ita-nia jeradór nomós halo instalasaun fiu husi jeradór ba kontadór eletrisidade ninian”, dehan Komandante PNTL Munisípiu Dili, Superintendente Polísia Henrique da Costa iha kna’ar fatin Kaikoli, segunda (07/06).

Ho ajudu ne’e, atu futuru karik hanesan ahi eletrisidade ninian mate, bele uza jeradór ne'ebé mak iha hodi halo servisu.

Durante mosu inundasaun iha loron 04 fulan-abril tinan 2021, rezulta arredór iha komandu Munisípiu Dili nian nakonu ho tahu, no parseiru TLPDP konsege orienta kompaña lokál balu lori rai-henek hodi ateru.

Maibé, hasoru mós problema eletrisidade ne'ebé sempre mate-lakan, tanba jeradór avaria inklui fiu eletrisidade balu kotu.

"Ida ne'e, sira kee dalan ne'e, para fiu ne'e sira hakoi tiha hotu husi okos, atu nune'e ba futuru sira servisu ruma mak nar-saida mós, labele interrompe. Ida ne'e, nia mantein ho situasaun ida agora, sei la tau alkatraun, tanba ita haree ita-nia kondisaun komandu Munisípiu Dili nee rasik mós ita seidauk hadi'a", hatete nia.

TLPDP nu'udár parseiru di'ak ba komandu PNTL nomós Munisípiu Dili, tanba durante ne'e simu apoiu barak ona hanesan, halo manutensaun ba karreta sira, inklui apoiu lona hodi instala postu seguransa polísia iha fronteira sira iha ambitu ba prevensaun surtu Covi-19.

"Ida ne'e bele responde ona, bainhira udan, bee sa'e, ka buat ruma mós, ida ne'e bele ajuda ona ba halo movimentu hodi halo servisu", haktenik nia.

Entretantu, kona-ba kustu husi manutesaun jeradaór ho instalasaun fiu eletrisidade ne'e, TLPDP mak hatene, no PNTL Dili hein simu de'it rezultadu.

Tuir planu, prosesu manutensaun ba jeradór no hakoi fiu eletrisidade iha rai-okos ne'e, sei halao durante loron tolu laran. (*)