Hafoin akontese trájedia, grupu deskoñesidu ne’ebé akompaña matebian ba nia rezidensia Lahane no sunu kedan oknum PNTL nia uma maizoumenus tuku 20:20 oras timor-leste (otl).
Ho ida ne’e, Xefe Suku Lahane Osidental, Francisco Ribeiro Faria Smith, ba www.tempotimor.com katak, grupu deskoñesidu ne’ebé sunu uma husi oknum PNTL, bainhira akompaña mate-isin ba nia rezidénsia Lahane.
“Sim sunu duni. Ema sira mai ne’e akompaña matebian husi ospital mai uma mak sunu. Ema sira ne’e ami la koñese hotu, sira barak,” deklara Francisco liuhusi telemóvel, sábadu (05/06).
Bainhira grupu ne’e sunu laiha autoridade seguransa ne’ebé halo atuasaun, tanba ne’e sira livre hodi sunu.
“Bombeiru sira mós mai maibé grupu sira iha ne’ebé haruka fila,” afirma nia.
Oknum PNTL ne’ebé tiru sidadaun na'in-tolu rezulta na'in-rua mate, no na’in ida tama iha Hospital Nacional Guido Valadares (HNGV) akontese iha loron sábadu (05/06/2021) tuku 2:00 otl.
Liga ba kazu sunu uma ne'e, www.tempotimor.com tenta konfirma ho segundu Komandante Polísia Nasionál Timor-Leste (PNTL) Munisípiu Dili, Superintendente Polísia Euclides Belo, maibé nia parte seidauk hetan informasaun klaru.
"Ita akompana media entaun ne'e loos, maibe ha'u laiha koñesimentu, tanba kazu ne'e iha ona nivel altu komandu jerál nian,".(*)
