Tempotimor (Dili)-Polísia Nasional Timor-Leste (PNTL) liuhosi komandu munisípiu Dili instala postu integradu ho komandu munisípiu tolu atu kontrola movimentu sidadaun sira durante aplika Serka Sanitária no Konfinamentu Obrigatóriu.

Postu konjuntu ne’ebé Komandu munisípiu Dili halo ho Aileu, Likisá ho Manatutu, hodi asegura sirkulasaun komunidade sira iha munisipiu ba kapitál Dili.

“Ita tau seguransa integradu para depois labele halo krekas postu seguransa, maibé tenke halo bokur. Siknifika katak PNTL Dili antes ne'e iha de'it membru 10 ne'ebé ita koloka, mais husi Manatutu mai tan hamutuk na'in-6, entaun ita iha 16, ne'ebé poupa seguransa bele mós espasu ba sira bele deskansa, poupa mós sira-nia enérjia para bele garante seguransa. Iha Tasitolu, Kasnafar ita aplikasaun hanesan”, informa Segundu Komandante PNTL munisípiu Dili, Superintendente Assistente Euclides da Costa Belo, iha Kaikoli, segunda (31/05).

Husi postu intragadu seguransa tolu ne'e, ofisial ida husi komandu PNTL munisípiu Dili nian mak lidera.

“Espera katak, mudansa ruma ne'ebé sei akontese iha tempu badak, ou sei mantein nafatin, ami sei mantein nafatin tuir orientasaun ne'ebé mak ami simu husi ierarkia komandu nian. Maibé, to'o agira dia 31 fulan-maiu ne'e, iha postu integradu ne'e sei ativu nafatin hodi garante seguransa”, dehan nia.

Postu integradu sira ne'e, ida koloka iha Postu administrativu Metinaru integra ho komandu munisipiu Manatutu, Kasnafar ho Aileu, Tasitolu ho Likisá hodi asegur dalan protokoler sira.

“Dalan ki'ik sira ne'ebé mak bele asesu ne'e, komandu munisípiu Dili ho Aileu tau matan nafatin, hanesan iha Marabia, Ai-tahan Belar no iha Heineken nia kotuk, ne'e PNTL Dili mak tau seguransa iha ne'ebá”, informa nia. (*)