"Iha ne'e hatete ona, oráriu ne'ebé kandidatu sira tenke ser kumpri, kada ema ida haree tuir nia númeru ne'ebé komisaun deside”, esplika Primeiru Vise Prezidente Komisaun Rekrutamentu Falintil FDTL, Capitaun Infantaria Rui Soares, iha kuartel jenerál Fatuhada Dili, sábadu (29/05).

Iha ne’e mós komisaun esplika, purezemplu, iha Munisípiu Dili nian, hatete ona, husi kandidatu númeru 1 até 120, ninia loron konsentrasaun iha loron 31 maiu 2021, fatin iha kuartel jenerál Fatuhada, iha tuku haat lokraik (16:00).

Siknifika tuku 4 lokraik kandidatu sira tenke konsentra hotu iha kuartel jerál, hafoin komisaun verifika dokumentu ne'ebé presiza, antes transporta ba Sentru Formasaun Prezidente Nicolau Lobato Metinaru.

Husi kandidatu sira ne'ebé nia naran komesa iha númeru 121 to'o 240, sei hala’o teste iha loron kuarta (03/06), maibé sira tenke ba aprezenta-an uluk ba ekipa komisaun rekrutamentu sira iha kuartel iha loron tersa (02/06), maizumenus tuku 16:00 lorokraik, hafoin parte komisaun halo uluk verifikasaun dokumentu nesesáriu sira, molok transporta ba Metinaru hodi tuir teste.

"Husi Dili nian efetivu hamutuk 394, nune'e kada kandidatu sira tenke haree tur ezemplu ne'e. Husi númeru 241 até 360 nia loron iha kinta feira, númeru 361 até 394, nia loron iha sesta”, informa nia.

Kandidatu sira husi Munisípiu Likisá nian, sei konsentra iha loron kuarta (03 juñu 2021), iha kuartel jenerál Falintil FDTL Fatuhada, iha tuku 16:00 lorokraik, no teste sei hala'o iha loron 04 fulan-Juñu 2021.

“Kada kandidatu bainhira sai husi uma atu ba tuir teste, ida-idak tenke lori rasik nia sasán, hanesan billete ou kartaun identifikasaun tantu, eleitór nomós billete identidade, depois tenke hodi kedas ho nia sapatillas ka sapatu no kalsa jinástika hodi ba tuir teste fízika nian no kualker teste”, esplika nia.

Entretantu Tenente Coronel Falintil FDTL, Constantino Morreira hatutan, kandidatu sira tenke lori ho karta kona-ba rezultadu husi "swab test" ne'ebé médiku sira halo ba sira.

"Tuir kritéria, kandidatu sira mai tenke lori ho karta swab husi médiku sira. Maibé rezultadu swab ne'ebé sei válidu ba 72 oras. Sé mak la lori, parte komisaun sei haruka filafali”, deklara nia.

Tanba ne’e, ba kandidatu sira ne'ebé nia rezultadu teste swab pozitivu, sei iha toleránsia atubele teste dala-ruak, maibé sé rezultadu mak pozitivu nafatin, sei la halo tan teste ba dala-toluk, no konsidera la liu.

Entretantu, kandidatu hamutuk 2,400 ne'ebé liu ona iha faze selesaun dokumentu iha feto 341, no mane 2,059.

Ba teste refere sei hala’o iha semana oin, kandidatu sira sei hahú ho teste médika, fíziku, psikotériku, no entrevísta (orál ho eskríta), iha sentru formasaun Prezidente Nicolau Lobato, Postu administrativu Metinaru, Munisípiu Dili. (*)