Tanba, joven sira ne’ebé komesa hamosu fali atetude ladi’ak iha loron hirak nia laran, sei fó oportunidade ba ema seluk atu aproveita hodi estraga estabilidade iha rai laran.

“Hahalok ne'ebé ita-nia oan sira halo iha horikalan horibainrua kalan, ne'e hahalok inmoral tanba ita Timor ho Timor mak halo malu hanesan ne’e atetude la di'ak, ne’e ba futuru ita la kontrola mak sei estraga ita-nia nasaun”, dehan Lere Anan Timor hafoin enkontru ho Prezidente Repúblika iha Bairro Pité, kuarta(24/03).

Kuaze kleur ona la rona kona-ba arte marsiál maibé ikus mai rona filafali ona, entaun ema bele aproveita filafali situasaun hirak ne'e.

"Ita Timor ukun-an tiha ona, oho malu, baku malu ne'e nia tempu liu ona, maibé ikus-ikus ne’e akontese filafali entre ita-nia joven, liuliu arte marsiál sira”, hatete Lere.

Ba kestaun hirak ne'e Polísia Nasionál Timor-Leste (PNTL) mak tenke toma medidas sériu ba ema kriminozu sira ne'e no hamutuk ho F-FDTL sei haree no rezolve hodi kontrola joven kriminal sira tanba sira mak futuru nasaun nia.(*)