Diretiva ne’ebé mak Komandu rua ne’e estabelese ho  númeiru 2/2022 kona-ba regra empeñamentu ba tranquilidade seguransa interna.

Haree ba diretiva ne’e, autoriza komandu rua serbisu hamutuk atu halo operasaun konjunta foti medida rigorozu atua situasaun seguransa iha territóriu nasionál liliu iha kapital Dili ne’ebé ikus ikus ne’e la hakmatek kauza husi konfrontu Grupu Arte Marsiál (GAM) no Grupu Arte Rituál (GAR) sempre provoka malu  hodi halo perturbasaun públiku, nune’e  halo públiku sente la seguru iha tempu kalan.

Xefe Estadu Maiór Jenerál F-FDTL, Tenente Jenerál Falur Rate Laek hateten, diretiva ida-ne’e atu responde situasaun ne’ebé ikus-ikus ne’e akontese iha rai laran ema sivil mós hahú tula liman ba membru F-FDTL.

“Ho asina diretiva konjunta ne’ebé mak ami asina ohin ne’e, apartir agora ba oin instituisaun rua ne’e F-FDTL no PNTL ami serbisu hamutuk hodi halo operasaun konjunta iha nivél nasionál hodi foti medida rigirozu hodi atua situasaun ne’ebé mak ikus-ikus ne’e mosu iha ita-nia rai nune’e ita bele kria pás kontribui ba no estabilidade nasionál”, dehan Xefe Estadu Maiór Jenerál F-FDTL, Tenente Jenerál Falur Rate Laek, liuhusi Konferensia Imprensa ne’ebé mak hala’o iha Kuartel F-FDTL, Fatuhada, sesta (09/09).

Iha operasaun konjuntu ne’e tuir Tenente Jenerál Falur Rate Laek katak, membru rua ne’e uza armas hodi atua situsaun, tanba militár no polísia ne’e treinanu uza arma.

“Labele dúvida fali ba instituisaun rua ne’e kuandu kaer kilat, militár no  polísia ne’e, loroloron ema sira ne’e treinadu kaer kilat, kuandu serbisu operasionál ne’e tenke kilat, kuandu laiha kilat ne’e arte marsiál”, afirma nia.

Ho operasaun konjunta ne’e rasik hahú ohin ba oin laiha tan GAM no GAR mak tenta halo perturbasaun públiku iha tempu loron no kalan se akontese Komandu rua ne’e liuhusi operasaun  konjuntu sei husu responsablidade ba dirijente sira.

Antes ne’e, Direjente GAM no GAR rasik kompremetidu ona atu kontrola nia membru sira hodi kontribui ba pás no dezenvolvimentu. Tanba forsa no polisia maka serbisu hamutuk ona ne’e dudu sei la ba.

Xefe Estadu Maiór Jenerál F-FDTL, Tenente Jenerál Falur Rate Laek, husu ba sidadaun hothotu atu kontribui kria pás no estabilidade.

“Husu ba inan aman sidadaun hotu atu kontrola oan sira liuliu joven  sira, husu tenke kontribui ba pás no estabilidade iha rai ne’e, tanba krime ne’ebé mak mosu ne’e barak liu alin joven sira ne’ebé mak moris iha era 2000 tesik mai”, dehan nia.

Xefe Estadu Maiór Jenerál F-FDTL, Tenente Jenerál Falur Rate Laek, nia mós husu ba politiku sira atu labele politiza situasaun, nune’e bele kontribui ba estabilidade nasionál.

“Politiku sira ha’u husu favor ida halo polítiku labele halo fali politisi  nune’e ita hothotu bele kontribui ba estabilidade”, afirma nia.

  Tenente Jenerál Falur mós rekoñese katak, situsaun sira ne’ebé ikus ikus mosu halo forsa polisia nia kredivilidade tun, tanba  tuir interpretasaun públiku  instituisaun rua ne’e maka la profisionál  bainhira halo intervensaun ba kazu ruma.

“Maibé instisaun rua ne’e kontinua komprometidu la hamonu konfiansa estadu nian ba rai tuir konstituisaun haruka”, dehan nia.

Iha fatin hanesan Segundu Komandante Jerál PNTL, Komisáriu Mateus Fernandes hatete, diretiva ne’ebé mak komandu rua asina ne’e, atu koresponde ba akontesimentu ne’ebé  inplika ba situasaun situasaun rai laran.

“Operasaun ida-ne’e atu institusaun forsa defeza no polísia afirma atu hambrik hodi responde ba situsaun sira ne’ebé akontese durante ne’e”, esplika nia.

Tanba durante ne’e lei sai ona no liuhusi KRAM fó regulamentu maibé  arte marsiál sira iha baze la implementa ho di’ak. Nune’e komunidade kontinua hakfodak no pániku.

Maibé komandu rua ne’e sei implementa diretiva ne’ebé mak komandu rua ne’e estabelese liuhusi akordu ona nune’e bele fó fali hakmatek ba  populasaun sira.

Governu liuhusi Ministru Interior no Ministru Defeza hasai despaxu númeiru 01/MI-MD/IX /2022, liuhusi diretivaa ida husu komandu F-FDTL no PNTL halo operasaun konjutu hodi retoma fali situasaun ne’ebé ikus-ikus ne’e akontese hodi hatauk komunidade.

Nune’e Governu konvoka enkontru ho dirijente arte marsiál no sira aseita katak ba membru arte mariál no rituál sei prosesu tuir lei.

Líder Arte Marsiál no estrutura konkorda, kuandu problema ruma mosu lalika dún malu maibé buka rezolve eduka no kontrola membru tuir lei númeiru 5/2017 rejime juridiku kona-ba prátika arte marsiál rituál  arma branka rama ambon.

Rezolusaun númeiru 4/2020 kona-ba reativasaun arte marsiál no tuir diretiva Komisaun Reguladora Arte Marsiál (KRAM) nian kona-ba kritéria rejitu no organizasaun arte marsiál no diretiva daruak husi KRAM nian matadalan ba treinamentu.

Líder arte marsiál sira kokorda atu atributu arte marsiál sira sei uza de’it ba fatin treinamentu duke uza ba fatin públiku hodi ha auto stop ba liberdade públiku no mós ba organizasaun ruma halo terror, ameasa anarkizmuno estraga ema seluk nia sasán satan família balun taun refusia ba fatin seluk. (*)