Ministru Defeza, Filomeno Paixão informa tanba limitasaun iha orsamentu inklui lojístika tanba daudaun ne'e iha Metinaro kuandu halo rekrutamentu másimu iha 600 pesoa tanba kondisaun lojístika la prontu hanesan, toba fatin, uma no han fatin.

"Ha'u-nia kálkulu agora ne'e senti sira haan de'it kalan bele hotu 3h ou 4h madrugada. De modu ne'e ita tenke prepara kondisaun ne'e hotu emidiatamente depois promulgasaun lei ne'e para depois implementa rekrutamentu iha tempu besik," Ministru Filomeno Paixão, ko'alia iha Palásiu Prezidensiál, Bairru-Pité, segunda (25/01).

Nia komprende prekupasaun husi Xefe Estadu Maiór, Majórr Jenerál Lere Anan Timur relasiona ho lojístika iha F-FDTL nian tanba orsamentu iha 2019 no 2020 mak konsege sosa kilat no munisaun husi Singapura, alende ne'e Fardamentu sosa husi osan 2020 nian.

"Ha'u komprende señor Jenerál nia preokupasaun no ha'u buka todos meus para depois halo nusá mak halo kulmatasaun ba nesesidade sira-ne'e, liuliu kona-ba ohin temi rekrutamentu 600 ne'e tanba iha difikuldade osan ne'ebé pakote fiskál fó ba iha Ministériu Defeza no FFDTL lato'o tanba ne'e mak ita redus ba iha 600 maibé ba iha 2022 ita sei propoin fali ba iha 1200 para depois kompleta fali," dehan Filomeno. (*)