Komandante Jerál PNTL, Komisáriu Faustino da Costa informa, sorumutu ne'ebé nia realiza ho komandante munisípiu sira, xefe departamentu sira, inklui unidade hotu-hotu, hodi transmite mensajen tolu husi PM Taur Matan Ruak nian ne'ebé hanesan mós Ministru Interior (MI) ida ba membru seguransa sira.
"Iha buat tolu prinsipál husi mensájen sua-exelénsia primeiru ministru nian, dixíplina, ne'e parte ida ke primeiru, segundu mak ierarkia ou kadeia komandu ne'e, no terseiru maka jestaun rekursu ne'e, entaun ida ne'e mak ohin transmite ba komandante sira," Komisáriu Faustino da Costa informa ba jornalista sira hafoin sorumutuk ho nia komandante munisípiu sira iha Kaikoli, segunda (25/01).
Nia dehan, liuhusi mensajen PM TMR nian ne'ebé nia transmite ona ba komandante munisípiu sira atu hatutan ba membru sira hodi aplika iha servisu fatin nomós bainhira ezekuta orden ruma iha terrenu.
Bainhira husu kona-ba mensajen tolu ne'ebé temi kona-ba jestaun rekursu umanu nian karik PNTL iha planu atu halo tan rekrutamentu ruma, nia dehan, asuntu rekrumentu parte ketak ida, maibé oinsá mak jere sira-nia rekursu ne'ebé dadaun ne'e iha ona hodi bele utiliza ho másimu.(*)
