Koamandu Falintil Forsa Defeza Timor-Leste (F-FDTL), husi komponente Naval Ligeria (KNL), kansela festa selebrasaun aniversariu ba dala XIX, tanba oras ne’e daudaun, Estadu Emerjensia bandu labele halibur malu liu ema na'in 10 hodi prevene moras Covid-19.
"Atu evita problema moras Covid-19, tanba ne'e husu konsiderasaun ba parte hotu no komprensaun ba desizaun ne'ebé Komandu F-FDTL, hodi kansela serimónia solene aniversáriu Komponente Naval Ligeira ba dala XIX ne'ebé sei hala'o iha 12 Janeiru 2021,” João da Silva hateten iha Komponente Naval, Hera, Kinta (07/01).
Nia mós afirma, durante ne’e Komponente Naval kontinua hala'o ninia misaun servisu inklui realiza atividade formasaun ba membru sira hodi ba hasa'e rekursu iha Akademia Militar, Australia, Japaun Estadu Unidus Amerika, Nova Zelandia, Brazil no nasaun seluk tan.
"Ami sei hasoru dezafiu barak intermus finanseira, rekursu maibé ida ne’e la hamate ami nia espiritu hodi serbi no kapasita nafatin membru sira atu konsolida forsa sai metin hodi serbi nasaun,” nia hateten.
Alende ne'e, Komponente Naval mos prepara ona rekursu hodi hola parte iha servisu Autoridade Maritima Nasionl (AMN) hodi asegura seguransa ba rikusoin hanesan mina, ikan, iha fronteira tasi Timor-Leste.
Iha fatin hanesan, Xefe Komisaun Organizadora Anivérsariu Komponente Naval Ligeira, Primeiru Tenente, Nicolao Sousa agradese ba autoridade suku Hera ho povu no juventude no membru polisia inklui patrosinador sira ne'ebe fo fundus no material hodi realiza eventu desportu sira.
Nia akresenta, Komandu Naval desidi hapara mos atividade sira seluk hanesan, konsertu muzika animasaun, dansa, jogu komunitariu sa'e bua no dada-tali, espozisaun no seluk tan.
Antes ne'e, iha fulan Dezembru tinan 2020 liuba, ekipa komisaun organizadora konsege realiza ona atividade jogu Copa Naval ne'ebe partisipa husi Klubu Futebool 42 inklui klubu 7 husi modalidade voly nian.
Nune'e, realiza mos formasaun ba espoza militár ne'ebe hala'o husi Asosiasaun Familia Militar (AFAMA), inklui programa doasaun raan ba Banku Sangue hodi apoiu pasiente sira ne'ebe hala'o tratamentu saude iha Hospital Nasional Guidu Valadares (HNGV) no kuda Aikameli. (*)
