Tempotimor (Dili)-Maske estadu governu aplika ona médida ne'ebé restritu liu iha fronteira rai hodi hatauk sidadaun sira ne'ebé tama sai ilegál, maibé dadaun ne'e sidadaun sira kontinua tama-sai ho konforme de'it.
Husi aktu sidadaun sira ne'ebé lakohi koopera no hatudu dezrespeitu ba estadu Timor-Leste, maka iha semana ne'e Polísia Nasionál Timor-Leste (PNTL) husi Unidade Patrollamentu Fronteira (UPF) no forsa konjuntu kaptura tan sidadaun na'in 12 iha fronteira rai.
"Iha semana ne'e ita kaptura sidadaun na'in 12 iha fronteira rai, tanba liuhusi dalan ilegál," dehan Komandante Jerál PNTL Komisáriu Faustino da Costa iha Palásiu Prezidensiál bairru-pite, Dili, Kinta (22/10).
Nia mós dehan, sidadaun na'in 12 ne'e sei tama kuarentena, kuandu kumpri ona loron 14 mak, foin kumpri dever ka multa, tanba viola regras estadu emerjénsia daneen nian.
"Husi na'in 12 ne'e, primeiru sira sei kumpri prosesu Ministériu Saúde (MS) nian, depois sira kumpri ona mak sei kontinuasaun ba prosesu administrasaun no sei investiga husi PNTL, depois enkamiña ba Direasaun Jerál Migrasaun ne'ebé tuir diretiva katak, sira aplika multa ba ema ne'ebé tama ilegál," katak Nia.
Entretantu, dadus ne'ebé iha katak, durante aplikasaun estadu emerjénsia ba daneen ne'ebé ho nia regra restritu liután, forsa konjunta iha fronteira rai kaptura ona sidadaun hamutuk na'in 26 ne'ebé iha semana kotuk, forsa sira kaptura uluk sidadaun na'in 14 no semana ne'e kaptura tan na'in 12 iha fronteira rai.(*)