Tuir PM Taur iha fator tolu ne’ebé halo movimentu illegal iha fronteira kontinua mosu. Ida mak relasaun familia entre populasaun iha area fronteira TL ho Indonezia, rua mak tranzasaun komersiu, no ikus mak liga ho atividade grupu artemarsiais.
"Kontinua tama ilegal iha fronteira ne'e, preokupasaun bo'ot, tan ne'e ami haree hela oinsa bele ultrapasa ida ne'e, mais iha fator tolu kontribui ba paisajen ilegais iha fronteira," dehan PM Taur hafoin reuniaun ho Prezidente Republika Francisco Guteres Lu olo iha palasiu prezidensial Bairo-pite, Kinta (17/09).
Iha fulan hirak ikus ne’e, PM Taur dehan, atividade grupu PSHT mak sita preokupasaun boot, tanba sira kontinua ultrapasa fronteira maske estadu implementa hela Estadu Emerjensia relasiona ho ameasa pandemia Covid-19.
Ita-nia oan sira husi PSHT ba-mai ilegalmente ne'e lori preokupasaun boot ba Ministériu Interior,” dehan nia.
Tan ne’e, nia parte kontatu ho lideransa PSHT nian atu koopera, tanba bainhira sira kontinua ultrapasa sei fó risku boot lori tama virus ne’ebé bele oho familia no komunidade.
"Ha’u hanoin sidadaun hotu tenke kontribui par situasaun labele prezudika sidadaun sira, tanba ne'e ha’u hakarak apela ba oan sira par kontribui ba seguransa, tanba moras ne'e perigozu," dehan nia.
Aleinde ne’e, PM Taur hatete, governu mós sei reativa Konsellu Seguransa Munisípal iha Munisipiu Bobonaro no Kovalima hodi reforsa seguransa iha fronteira.
Ministériu Interior, nia hatete, sei halo investigasaun kle'an atu bele deteta rede ne’ebé karik iha hodi fasilita sidadaun sira tama no sai ilegalmente iha fronteira.
"Agora ita halo investigasaun maka’as par bele deteta iha faktu ruma ou lae ita-nia ema fó kontribuisaun ou husi Indonezia fó kontribuisaun ba fasilita sidadaun tama no sai ilegal iha fronteira, tanba ne'e ami buka faktu, kuandu hetan naturalmente sei toma medidas par minimiza pasajen hirak ne'e," dehan PM Taur.