Maijor Jenerál Lere deskonfia mosu movimentu ho numeru boot tanba iha ema balun mak fasilita.

"Ita preokupa tanba hakat fronteira ne'e ilegál maka barak, hanesan foin dadauk dehan ema na'in 300 ka liu ida ne'e. Agora ita kestiona se maka fasilita sira ne'e, 300 nee ema ruma fasilita maka sira bele atravesa seim ita-nia seguransa dekteta. Situasaun ida ne'e tanba ita labele admite," dehan Lere iha Palásiu Prezidensiál bairru-pite, Kuarta (16/9).

Lere afirma, hakat liu ilegál ida uluk ne'e laiha moras, maibé agora iha moras aat.

"Ilegál hanesan uluk ne'e karik, ita dehan katak ilegál, maibé agora ne'e alende ilegál at liután bele fó impaktu negaitvu boot ba ita tanba situasaun Covid-19 ne'e," katak nia.

Lere mós husu ba governu atu tau atensaun ba ema estranjéiru ne'ebé tama sai iha Timor-Leste.

Nia dehan, ema ne'ebé tama ilegál ne'e iha na'in 80 husi ema estranjéiru.

"Nusa maka ita halo médida ida depois prátika ne'e halo oin seluk, se ita deside katak ita limita movimentu estranjéru ninia, limita ona! nusa maka uluk ita deside agora halo fali? ne'e maka ha'u hanoin katak ne'e kestaun seguransa liu-liu ba ita-nia lider sira ne'ebé toma konta mós iha responsabilidade," Lere tenik.

Entretantu Lere mós dehan, governu atuál la ativu maibé pasivu liu.

"Ita-nia governu agora ne'e ha'u hanoin katak pasivu demais, sira ne'e diak liu, dala ruma di'ak liu ba ema halo sala ne'e, ema komete krime mós sei saida ne'e maka sira atravesa fronteira ilegál, hatama kuarentena depois governu fó tan hahan haruka ba ótel selu rasik. Entaun tenke toma médida ruma, tanba ita hanoin katak ida ne'e, ita labele halimar ho ita-nia povu ninia vida," nia dehan.(*)