Nune'e, iha biban ne'e, Komandu PNTL Minisipiu Dili halo vizita ba Institutu Siénsia Saúde (ICS), hodi sosializa servisu polisia komunitária nian atu garante pás no estabilidade iha komunidade nia leet.
Segundu komandante PNTL Munisípiu Dili, Superentendente Asistente PNTL Euclides Belo, ne'ebe sai doadór ba eventu ne'e iha ICS hateten, programa komandu nian servisu hamutuk hodi garante kapitál seguru ba ema hotu.
"Programa ne'e halo ona sensibilizasaun iha universitáriu hotu-hotu hanesan UNTL, UNDIL, UNPAZ, DIT, IOB, UNITAL, no ICS hodi sensibilisa matéria polisiamentu komunitária", dehan nia, iha Kampus ICS, Komoro, Kuarta (16/09).
Nia hatutan, programa ne'e kobre hotu ensinu superiór hafoin ba etapa segundu ensinu sekundária, tanba sekundária iha Dili laran ne'e barak. Tuir planu, sei la hotu iha 2020 maka 2021 sei kontinua nafatin.
Ensinu sekundária hotu maka sei tun ba infantíl sira, inklui inan-aman no família iha suku no aldeia.
Iha fatin hanesan, Reitór ICS, Domingos Soares, agradese ba PNTL nia prezensa tanba fo hanoin no konstrui estudante sira hodi bele iha koñesimentu kona-ba polisiamentu komunitária, rodaviaria no tránzitu, inklui investigasaun kriminál.
"Kuandu pontu tolu ne'e mak sira komprende didi'ak maka sira sei fó liman ba polisia atu bele kria estabilidade iha institutu ne'e no iha sira nia sosiedade no iha rai ida nee" dehan nia.(*)