Loron Ida na’in 4 Mate, Feto Ida Tara An

Portavoz Polisia Nasionál Timor-Leste (PNTL) Superintendente Arnaldo Pereira ko;alia ba Jornalista sira iha nia kba'ar fatin iha Dili Portavoz Polisia Nasionál Timor-Leste (PNTL) Superintendente Arnaldo Pereira ko;alia ba Jornalista sira iha nia kba'ar fatin iha Dili Foto Isac Oliviera

Tempotimor (Dili)-Iha loron ida nia laran ema na’in 4 lakon sira-nia vida. Na’in tolu tanba asidente trafiku no na’in ida seluk tanba tara an.

Tuir informasaun husi portavoz Polisia Nasionál Timor-Leste (PNTL) Superintendente Arnaldo Pereira, iha Domingu (12/07), iha ema na’in 4 mak mate. Na’in tolu mate iha Pante Makasar, Rejiaun Administrativu Espesial Okusse-Ambeno (RAEOA) tanba kamionete baku fila, no feto ida mate iha Hatulia, Munisipiu Ermera, tanba tara an.

Ba na’in 3 ne’ebé mate iha asidente trafiku, Arnaldo informa,  ema na’in tolu ne’e sa’e kamioneta hamutuk ho ema na’in hitu (7) seluk.

Kamioneta ne’ebé ema hirak ne’e sa’e, nia dehan, tula mós sasan barak ne’ebé halo kamioneta ne’e todan, ho nune’e kamioneta laiha forsa bainhira sa’e subida iha dalan entre Oelulan no Lakufuan, Suku Naimeko, Pante Makasar.

“Iha asidente ida ne'ebé akontese iha Domingu iha tuku 19:45, karreta truk ida baku fila, ne'ebé mak rezulta ema na'in tolu mate no na'in hitu seluk hetan kanek," dehan Arnaldo iha Kuartel Jerál PNTL Kaikoli, Segunda (13/07).

Tuir informasaun, Arnaldo dehan, asidente ne’e akontese, tanba kamioneta lori sasan barak no la konsege sa'e subida.

"Motorista ne'ebé diresiona karreta truk ne'e la konsege sa'e subida, tanba nia lori sasan barak, inklui pasajeiru mós barak. Entaun karreta ne'e la konsege sa'e subida,” dehan nia.

Aleinde ne’e, nia informa mós, joven ida iha Suku Manu-kate, Postu Administrativu Hatulia, feto ida ho idade tinan 24 mate tanba tara an.

"Joven feto ida ho naran Joaninha de Jesus, idade tinan 24, tara-aan,” dehan nia.

Tuir informasaun, nia hatete, durante ne’e vitima iha difisiensia psikolojia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.