SM Hahú Prosesa Deporta Ema Estranjeiru 13 ne’ebé Tama Ilegal iha Jaco

Diretór Imigrasaun Superentedente Xefe Agustinho Gomes enkontru ho parte sira relevante iha ninia gabinete Diretór Imigrasaun Superentedente Xefe Agustinho Gomes enkontru ho parte sira relevante iha ninia gabinete Foto suplai

Tempotimor (Dili)-Serbisu Migrasaun (SM) Timor-Leste hahú ona prosesu atu deporta ema estranjeiru na’in 13, kompostu husi sidadaun Vietname na’in 11 no sidadaun Indonezia na’in 2, ne’ebé tama illegal iha Timor-Leste.

Diretór Imigrasaun Superentedente Xefe Agustinho Gomes informa, ema estranjeiru hirak ne’e tama ilegalmente liu husi illa Jaco, Postu Administrativu Tutuala, Munisipiu Lautem.

Hafoin kaptura iha 12 Juñu, nia dehan, ema estranjeiru hirak ne’e kumpre kriteria Ministériu Saúde (MS) hodi halo kuarentena.

"Sidadaun sira ne'e tama iha teritóriu nasionál iha loron 12 Juñu 2020, no kazu ne'e lori ona ba Ministériu Públiku munisípiu Baukau ne'ebé hetan ona despaxu no entrega ba PSIK depois entrega fali mai serbisu migrasaun Ministériu Interiór," dehan Agostinho iha edifísiu Ministériu Interior, Kaikoli, Tersa (14/07).

Nia hatete, parte migrasaun sei haree kondisaun sidadaun estranjeiru hirak ne’e hafoin kontinua prosesu deportasaun.

"Orsida sei ba check fíziku sidadaun sira-nian depois sei kontinua haree fali, oinsa atu kotinua prosesu tuir lei imigrasaun no azíliu númeru 11/2017. Bainhira prosesu ne'e hotu mak sei haruka sidadaun sira ne'e ba sira-nia nasaun," nia dehan.

Ema estranjeiru na’in 13 ne’e tama iha kuarentena iha YQ Hotel iha 13 Juñu 2020.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.