Deputadu Leandro Lobato husi Bankada CNRT hato’o kestaun ne’e relasiona ho deklarasaun Maijor Jeneral Lere iha semana kotuk ne’ebé hatete, membru F-FDTL bele halo juramentu ba see de’it, maibé importante mak iha nafatin lealdade ba ninia superior ka komando.
Ba deklarasaun Lere ne’e, Leandro hatete, Lere ho konsientemente kontra konstituisaun Repúblika Demokratika Timor-Leste (K-RDTL).
"Deklarasaun ida ne’e hatudu momoos katak Maijor Jeneral Lere Anan Timur konsientemente kontra ita-nia Konstituisaun Repúblika, tanba FALINTIL-FDTL atu garante objetivu fundamentais defeza seguransa ba Timor-Leste husi ameasas estadu, krime organizadu no terrorizmu," dehan reprezentante Bankada CNRT ne’e iha PN, Tersa (14/07).
Nu’udar instituisaun estadu, Leandro dehan, F-FDTL no PNTL labele husik nia membru partisipa, sa tan halo juramentu ba grupu arte-marsiais ka partidu politiku.
Tuir K-RDTL artigu 146, alineia 3 kona-ba Forsa Armada sira, hatete, “FALINTIL-FDTL labele iha partidu polítiku no rona de’it ba órgaun soberanu kompetente sira, tuir Lei Inan no Lei, no sira labele halo intervensaun polítiku naran ida”.