Lidér 74 Sukit Malu : Lere Husu Sala Lori Ba Tribunal La'os Julga Malu Iha Midia

Xefe estadu maiór F-FDTL Maijór Jenerál Lere Anan Timur  ko'alia ba Jornalista sira hafoin sorumutuk ho Prezidente Republika iha Palasiu Prezidensial (1/7) Xefe estadu maiór F-FDTL Maijór Jenerál Lere Anan Timur ko'alia ba Jornalista sira hafoin sorumutuk ho Prezidente Republika iha Palasiu Prezidensial (1/7) Foto Midia PR

Tempotimor (Dili)-Xefe estadu maiór F-FDTL Maijór Jenerál Lere Anan Timur husu ba lidér nasionál sira husi 74 atu para ona vinga malu no ataka malu hodi hatudu rat hela memoria aat ba jerasaun foun. Tuir Lere wainhira lider sira iha sala ruma lori malu ba tribunal, labele ke'e malu iha midia hodi halo públiku interpreta oioin no hamosu diskriminasaun entre lider sira.

"Krize lideransa mak iha, krize lideransa ne'e la'ós lideransa 2020 nian, maibé lideransa 74 nian, imi rona, sira kritika malu, sira akuza malu naok osan, buat sira ne'e hotu," Maijór Jenerál Lere Anan Timur ba jornalista sira iha Palásiu Prezidensiál bairu-pite Dili, Kuarta (01/07)

Eis Sub Xefe Estadu Maior das FALINTIL ne'e mós apelu ba lidér 74 sira atu tuur hamutuk hodi buka konsensu ba Timor nia di'ak.

"Ha'u apela ba lidér nasionál sira hotu katak, imi-nia problema iha liur ka iha funu laran ne'e to'o de'it iha ne'ebá ona, lalika lori tan mai Timor, sese mak naok ne'e lori ba tribunál, labele tau fali iha média para kria konfuzaun ba ema, ba komunidade inklui kria konfuzaun ba ofesias sira iha F-FDTL no PNTL, para ema halo avaliasaun katak lidér ida ne'ebá mak di'ak, ida ne'ebá ladi'ak ka ida ne'ebá mak serve, ne'e laiha, lider iha 74 ne'e hotu lider istóriku, matenek ne'ebé lori ita-nia nasaun ba ukun aan," dehan Maijór

Hanesan publiku tomak akomapna ikus-ikus ne'e lideransa Jerasaun 1974 hahu fali ke'e malu iha Midia kona ba erru pasadu. Jenerál fitun rua ne'e afirma, funu hotu ona, lalika lori tan funu mai Timor.

"Problema funu nian ne'e hotu ona, lalika lori tan mai iha ne'e, se uluk iha imi iha liur ne'ebá mak diskute malu, hadau malu, lalika lori ida ne'e mai timor," nia dehan

Lider fitun rua ne'e mós husu ba lider nasionál sira tuur hamutuk.

"Husu ba imi lidér nasionál 74 sira tuur hamutuk, konsensu hodi lori timor ba oin, diriji jerasaun foun sira ho matenek, atu sira bele manan esperiénsia hodi bele ukun ita-nia rai, tanba ne'e lae ita haree ba ita-nia lider sira ne'e ita la kontente," dehan Lere

Lider ne'e mós dehan, povu barak mak sei terus, tanba saida lider sei haksesuk malu?

"Ita-nia povu ki'ak, faluk no oan-ki'ak nakonu ita-nia rai, nusa imi sei haksesuk malu ida ne'e, buka tuur hamutuk, hetan konsensu lori ita-nia nasaun ne'e ba dezenvolvimentu, ida ne'e mak di'ak liu," Lere hakotu.

Rate this item
(0 votes)
Last modified on Wednesday, 01 July 2020 12:18
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.