Rotasaun Ofisiais Superior PNTL 25 : Henrique Lidera Dili, Armando ba Baukau

Enkontru ofisial superior ho komando PNTL iha Quartel PNTL Dili Enkontru ofisial superior ho komando PNTL iha Quartel PNTL Dili Foto PNTL

Tempotimor (Dili)- Komandu Jeral Polisia Nasional Timor-Leste (PNTL) hasai ona despaisu hodi halo transferénsia servisu ba ofisial komadante hamutuk nain 25, desizaun transferensia servisu ne'e bazeia ba alinea E numeru 3 husi artigu 10, Lei organiku ba PNTL.

Tuir dokumentus ne'ebe www.tempotimor.com konsege asesu komando PNTL esplika katak ho motivu servisu no instituisaun nian nune'e nesesariu hodi halo rotasaun ba ofisiais husi Polísia Nasional Timor-Leste (PNTL) hodi aplika no dezempena kapasidade ne'ebe mak sira iha ba servisu fatin ne'ebe mak diferente nune'e labele sente chato.

Nesesita tebes halo rotasaun ba ofisiais superiores sira nune'e bele aplika koinesimentu no kapasidade ne'ebe mak sira iha hodi komanda jere, kontrolu no Administrasaun.

"hau atan hato'o ba maun katak bainrua dia 30 Juno 2020, hau halao knar fila fali iha Komando PNTL ......... efektivu dia 01 Julo 2020 no Komandante foun Superintendente Chefe ........ ba sei asume Kargo Komandante Komando PNTL ...... hodi troka hau. Hau husu deskulpa durante maun nia akampanha hau Komanda .......hodi garante situasaun durante tinan ida. Buat balu la tuir maun sira nia laran nu'udar humano hau husu deskulpa espera Komandante foun ne'ebe hetan fiar, diak liu tan hau hodi garante sguransa no estabilidade," dehan ofisial superior ida ne'ebe durante ne'e asume kargu komandante iha Munisipiu ida iha TL.

Nia haktuir, "Dia 24 Juno 2020, tuku 15h00 PM Taur simu posse nu'udar Ministro Interior no dia seguinte 25 Juno 2020 Komandante Jeral hasai Ordem hodi halo Rotasaun no transferencia e dia 26 Juno 2020 mak hau simu ordem. Hanesan ofsiais ida iha PNTL ha'u prontu kumpri ordem komando nian."

Atu kompleta estrutura ne'ebe Komandu jeral PNTL planeia mak sei halo transferénsia ba ofisiais superiores husi Gabineti Inspesaun Oekusi (GIO), Komandu Munisipiu Bobonaru (KMB), Komandu Munisipiu Oekusi, Komandu Munisipiu Manatutu, Komandu Munisipiu Lautem, Komandu Munisipiu Likisa, Komandu Munisipiu Dili, Komandu Munisipiu Aileu, Komandu Munisipiu Ermera, Departamentu Justisa (DJ), Departemen Administrasaun i Planeamentu, Unidade Patrollamentu Fronteira (UPF), Servisu Informasaun Polisia (SIP), Servisu Investigasaun Kriminál Nasional, Servisu Migrasaun, Gabineti Sekretariu Estadu Protesaun Sivil, Gabineti Komadante do Komandu Operasaun, Komadante do Komandu Administrasaun, Gabineti Relasaun Internasional no Sentru operasional.

Haree ba kompetensia ne'ebe Lei atribui ba komandante jeral PNTL iha alinea E numeru 3 husi artigu 10 dekretu Lei numeru 9/2009 loro 18 Fulan fevereiru, Lei organiku PNTL.

Tuir lista ne'ebé Tempotimor asesu fó sai naran komandante sira ne'ebé hetan mudansa iha servisu maka Superintendente Xefe, Hendrique ho (ID 10058) husi Komandante Servisu Investigasaun Kriminál Nasionál (SIKN) transfere ba Komandante Munisípiu Dili, Superintendente José Maria Neto Mok (ID 10483) husi Servisu Informasaun Polísia (SIP) muda ba Komandante Servisu Investigasaun Kriminál Nasionál (SIKN) Superintendente Xefe Agostinho da Silva Gomes (ID 10722) Diretór Jerál Servisu Migrasaun Ministériu Interiór (DJRM-MI) muda ba Komandante Munisipiu Ermera, Superintendente Xefe, Mateus Asunção Mendes Komandante Operasaun muda Komandante Polísia RAEOA.

Superintendente Xefe, Armando Monteiro Komandante Munisipiu Dili muda ba Munisípiu Baucau, Superintendente Xefe Hermenegildo Gonçalves da Crus (ID 10108) Komandante Munisípiu Baucau muda ba ba Komandu Jerál Servisu Informasaun Polísia (SIP), Superintendente Xefe Arnaldo de Jesus Almeida D.C. Araújo (ID 10310) Komandante RAEOA muda ba Komandu Jerál GCCRI.

Komandante Unidade Patrolliamentu Fronteira (UPF) Superintendente, João Belo dos Reis, (ID 10074) muda ba Komandante Servisu Migrasaun Ministériu Interiór, Superintendente, João da Costa (ID 10010) Komandante Munisípiu Bobonaro muda ba Munisípiu Manatuto, Superintendente, Umbelina dos Santos Soares (ID 10042) Komandante Munisípiu Aileu muda ba Munisipiu Liquiça, Superintendente, António do Rego Fernandes (ID 10275) Servisu Informasaun Polísia muda ba Munisípiu Lautem, Superintendente Antoninho Mauluta (ID 10469) Komandante Departamentu Justisa muda ba Munisípiu Bobonaro.

Superintendente, Ludgerio Picancio Madeira Lay (1D 10213) Komandu Administrasaun PNTL muda ba Munisípiu Ermera, Superintendente Calistro Gonzaga (ID 10909) Komandu Operasaun muda ba Komandu Administrasaun DAP Superintendente, Sebastião Alves Quintão (ID 10236) Komandante Munisípiu Lautem muda ba Munisipiu Viqueque, Superintendente, Paulino Carmo Pereira (ID 10131) RAEOA muda Komandu Jerál SIKN, Superintendente Nicolau F. da Costa (ID 10155) GIG muda ba RAEOA, Superintendente, Julia da Gama Komandante Munisípiu Manatuto muda ba Komandu Jerál Gender, Superintendente, Ismael da Costa Babo (ID 10109) Diretór Jerál Servisu Protesaun Sivíl, Sekretáriu Estadu Protesaun Sivíl (SEPS) muda ba DTRN.

Superintendente Asistente Pascoal Ferreira Guterres (ID 10130) Komandu Operasaun muda ba Munisípiu Lautem, Superintendente Asistente António Lourenço da Costa Soares (ID 10931) Komandante Munisípiu Ermera muda ba Munisípiu Aileu, Superintendente Asistente Luis da Silva (ID 10013) Komandante Munisípiu Liquiça muda ba Komandu Jerál Tezouru, Superintendente Asistente, Agosto Tilman da Costa (ID11082) GCCRI muda ba CON no Superintendente Asistente Fasio de Jesus Lima (1D 10069) Servisu Migrasaun muda ba Komandante UPF.

Despaisu ne'e efetivu komesa loro 01 Fulan Jullu tinan 2020 ida ne'e data ne'ebe tenke halo aprezentasaun iha fatin kolokasaun foun.

Ba ofisiais sira ne'ebe mak transferidu, alende halo relatoriu servisu hodi estraga ba Gabineti Komandu jeral, nune'e mos tenke entrega hotu Material/Ekipamentu/Armamentu organiku. Transporte (kareta) no mos kartaun telifoni (Sim card) ne'ebe mak durante iha ninia responsablidade.

Despaisu ba nomeasaun sei realiza iha momentu halo tomada de posse ne'ebe mak sei realiza iha Komandu Jeral PNTL iha oras ne'ebe determina ona.

Rate this item
(2 votes)
Last modified on Tuesday, 30 June 2020 12:38
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.