Portavoz SIJK, doutora Odete Viegas hateten, husi loron 28 fulan Maiu to'o loron 08 fulan Juñu, sidadaun timoroan no sidadaun estranjéiru na'in 27 mak tama iha Timor Leste.

"Ema tama ilegál hahú husi loron 28 Maiu to'o ohin 08 Juñu hamutuk na'in 27. Husi na'in 27 ne'e ita deporta fali na'in 6, tanba la'ós timoroan. Enkuantu, timoroan sira tama ona iha karantina," Odete hateten liu-hosi konferénsia imprensa iha sala situasaun, Segunda (08/06).

Sidadaun sira ne'ebé tama ilegál mai teritóriu nasionál ne'e maioria estudante timoroan ne’ebé hala’o hela estudu iha Indonézia, no mós negosiante mina-rai.

“Husi na’in 27 ne’e, iha na'in 12 mak tama husi Batugade-Maliana, ne’ebé na'in 10 tama ona karantina, na'in rua seluk deporta hikas tanba sidadaun Indonézia. Na’in 6 tama husi Salele-Kovalima, nune’e na'in 3 tama ona karantina, na'in tolu deporta hikas tanba la'ós timoroan. Na'in 9 tama husi fronteira Terrestre RAEOA parte Oesilo, Pásabe no Oelulan, nune’e na'in 8 tama ona karantina, no na'in ida deporta hikas ba Indonézia”, nia esplika.

Entretantu, Estadu Emerejénsia ba datoluk, ne’ebé Prezidente Repúblika renova, suspende direitu tolu, mak hanesan, Sirkulasaun internasionál, Liberdade sirkulasaun no hili hela-fatin iha territóriu nasionál, inklui direitu ba rezisténsia.
Dekretu Prezidensiál ne’e, ofisialmente publika ona iha jornál repúblika ho númeru 35/2020, ne’ebé funsiona iha oras 00: 00 loron 28 fulan maiu to’o oras 23:59 loron 26 fulan juñu 2020.