Tuir informasaun ne’ebé www.tempotimor.com asesu iha loron 08 fulan-agostu tinan 2023 katak, kapturasaun ba suspeitu ne’e, tanba simu informasaun husi vítima, xefi Servisu Informasaun Polísia (SIP) nasional, hatun kedas diretiva ba ekipa konjunta kompostu husi Aranha Leste, Aranha Oeste, Makikit Dili no SNI destakadu PNTL hodi buka tuir autor nain-1 ba krime furto no konsege asegura ona suspeitu ne’ebé envolve kazu naok karteira.

Suspeitu ne’e husi Talimoro-Gleno, Munisípiu Ermera, no ekipa konjunta kaptura iha área Tasi Tolu asegura mos evidensia karteira ne’ebe nia naok.

Hafoin asegura suspeitu, ekipa servisu kontatu kedas ba vítima hodi hein iha esquadra PNTL Nain-Feto no ekipa lori kedas suspeitu hamutuk ho evidensia mai entrega.

Suspeitu AMS iha nia deklarasaun hatete, nia ho intensaun hakarak naok duni tanba aman rasik mate ona no nia inan moris kiak hela ho triste mak nakonu hodi enfrenta situasaun ne’ebé defisil ba osan, ai-han laiha, no kondisaun uma ne’ebé la seguru, realidade moruk ida ne’e aumenta tan ho la iha tebes osan atu selu kareta hodi viajen ba iha Ermera.

Durante ne’e suspeitu servisu hanesan badaen halo uma iha Munisípiu Atauro, maibé nia patraun seidauk selu ho ida ne’e maka nia halo asaun naok ne’e.

Enkuantu osan ne’ebé iha karteira laran hamutuk US$60.00 no suspeitu gasta ona US$20.00 hodi sosa hahan.

Deklarasaun husi suspeitu, loke vítima nia laran no hakarak perdua suspeitu no husu atu suspeitu AMS labele halo tan asaun ne’e tanba ema wain mak ho kondisaun moris defisiente, balu sofre moras, balu moris kesi kabun dader to’o kalan mos sei aguenta buka servisu ba moris fila rai kuda ai horis nakfilak ba osan.

Vítima rasik konkorda hakarak rezolve tuir família tanba nia sente laran susar no hanoin tebes suspeitu nia deklarasaun tanba vítima rasik mai husi família ne’ebé moris iha uma laran susar hotu. (*)