Komandante Sentru Formasaun Polísia (CPF), Superintende Xefe Arquimino Ramos hatete, sira konvida servisu investigadór kriminál sira hodi haree no halo revizaun ba kurikulu kualifikadu ba servisu investigasaun kriminál nian.

“Kurikulum ne’ebé eziste ne’e presiza halo revizaun tuir padraun kualifikadu ne’e iha tempu ba tempu tanba kurikulu ne’ebé di’ak ne’e presiza responde nesesidade nian no espetativa ita-nia sidadaun sira-nian tanba ne’e mak ita konvida investigadór husi Munisípiu sira inklui investigadór nasionál sira para hetan sira-nia informasaun ruma atu hadi’a kurikulu ne’ebé eziste tiha ona tanba ba oin ita avaliasaun katak, dezafiu ne’ebé sei boot liután ba oin projetu tasi mane ne’e iha sai ameasa mak ita-nia rai ne’e iha Portu Tibar ne'e bainhira halo operasaun ameasa saida mak iha ne’ebá iha krime saida mak sei akontese entaun presiza avalia nesesidade sira ne’e para orsida tau iha kurikulu ne’ebé di’ak orisda responde servisu investigasaun kriminál nian nomós nesesidade povu iha rai ida ne’e”, dehan Komandante CFP Arquimino Ramos ba jornalista sira iha CFP, Komoro, kinta (09/06).

Komandante Servísu Investigasaun Kriminál Nasionál (SIKN), Superintende Xefe José Neto Mok informa, sei halo mós avaliasun ba servisu investigadór sira no kontinua apoiu formasaun ba membru sira ne’ebé mak tuir ona formasaun iha nível primeiru no segundu.

“Antes atu halo uluk workshop ida ne'e ami halo avaliasaun ba investigasaun kriminál iha Munisípiu 13 mai iha ne'e atu halo aprezentasaun ida katak ita-nia membru hirak mak durante ne'e iha ona abilidade liliu ba kursu investigasaun kriminál nian e alende ne'e nível ida ne'ebé balun iha nível ida, balun iha nível rua no hira mak seidauk hetan kursu entaun ho avaliasaun ida ne'e ita identifika ema na'in hira mak presiza ba kursu nível ida no hira mak ba iha nível rua nian  no balun ne'ebé mak hetan ona kursu nivel ida tenke ba nível rua nia para nune'e ita bele kapasita ita-nia membru sira ne'e halo didi’ak para hodi atende ita-nia nesesidade iha nível munisípiu no nasionál sira, alende ne'e halo avaliasaun ba servisu investigasaun kriminál iha Munisípiu sira mai aprezenta eskrita para ita bele avalia”, dehan nia.

Tanba dala membru barak mak halo servisu maibé laiha relatóriu no sira relata de'it ba sira-nia Komandante iha distritu entaun tenke fó hanoin katak tenke hato'o relatóriu ba nasionál.

“Para nasionál ne'e mak orsida halo dezeña planu se agora imi laiha relatóriu mai ami entaun ne'e bele falla iha ita-nia kontrolu nesesidade saida mak presiza ita tenke avalia atu hodi haree no tun ba terenu nesesidade saida maka sira presiza rekursu umanu ka material ida ne'e mak ita halo avaliasaun”, afirma nia.

Nune’e, molok halo revizaun kurikulu kualifikadu ba SIKN sei husu mós xefe investigadór sira-nia ideia atu fó imput ba CFP hodi hadi’a sistema liliu iha servisu investigasaun iha Timor laran tomak. (*)