“Kona-ba sidadaun sira hela iha liña Fronteira halo atividade negósiu ilegál ne'e, tanba problema nesesidade ekonomia, nune'e atu evita sidadaun sira halo atividade negósiu ilegál, ha’u hanoin ita reativa merkadu livre iha fronteira ne'e di’ak, ita bele kontrola ona sira liuhusi dalan legál mak halo negósiu, depois ba nia autoridade segurasan PNTL ho UPF kontrola sira, tanba ne’e Governu Timor-Leste ho Indonézia tenke funsiona fali merkadu livre ne'e iha fronteira”, dehan Jestór Prinsipál Fundasaun Mahein (FM), Abel Amaral, iha kna’ar fatin Bairo Sentrál, kinta (09/06).

Bainhira implementa merkadu livre ne’e Governu Timor-Leste ho Indonézia mós tenke haree sasán esensiál saida mak merese atu fa’an iha fronteira nune’e sidadaun sira bele asesu no sosa hodi sustenta sira-nia moris.

Diretór Ezekutivu Yayasan HAK, Sisto dos Santos hatete, Governu laiha mekanizmu ida hodi estabelese merkadu livre ida ne’e difísil kontrola movimentu sidadaun sira iha rai ketan Timor-Leste ho Indonézia, tanba probema nesesidade sira tenke hakat ilegál.

“Ita la justu bainhira kondena no kaptura bebeik ita-nia sidadaun timoroan sira ne’ebé mak ba sosa nesidade báziku sira atu sustenta sira-nia moris, tanba ne’e ha’u hanoin tempu ona ba ita-nia Governu atu ko’alia ho Indonézia kria zona merkadu livre iha fronteira mak seguransa sira kontrola, ida-ne’e hanoin ilegál sei la akontese tan ona”, afirma nia.

Governu Timor-leste ho Indonézia halo diálogu ida ho komunidade sira ne’ebé hela iha fronteira ne’e hodi identifika problema sosiál, ekonomia kultura edukasaun bele kria sistema merkadu livre ida hodi fasilita sira sosa nesidade bázika.

“Lolos ne’e ita-nia konsuladu sira iha Indonézia ne’e ko’alia atubele implementa merkadu livre iha fronteira mak ita-nia autoridade seguransa sira kontrola, atu evita movimentu ilegál, maibé realidade ita gasta osan selu konsuladu nia funsaun laiha la halo buat sira hanesan ne’e”, esplika nia.

Komandante Unidade Patrollamentu Fronteira (UPF), Superintendente Euclides Belo hatete, problema ne’e dala barak ona sidadaun sira kontra regra, liliu halo movimentu ilegál tanba nesesidade báziku obriga sira tenke hakat ba sosa fós ho mina.

“Problema ne'ebé ita indentifika iha fronteira dadaun ne’e ita halo ona rekomendasaun ida, atu husu Governu rai rua ne’e ko’alia ba malu bele kria merkadu mobel para fasilita ita-nia sidadaun sira asesu ba sosa tuir distánsia ne’ebé mak sira hela”, dehan nia. (*)