“Ita haree fali ba kotuk, sempre mosu violénsia entre militante no apoiante ne’ebé barak liu envolve joven sira, entaun tempu ona atu muda mentalidade ida ne’e no husik sai referénsia lisaun ida. Ha’u aproveita oportunidade ida ne’e hakarak apela ba joven sira tenke sai instrumentu ba dame atu hakribi violénsia kontribui ba paz tanba dezenvolvimentu nasaun atu la di’ak presiza pas no estabilidade hodi hadi’a povu nia moris di’ak”, dehan Antonio Armido, iha Vilaverde, sábadu (05/03).

Tanba joven iha papel importante hodi kontribui ba paz, estabilidade no tenke sai aliserse ba hametin unidade nasionál hodi aselera prosesu dezenvolvimentu nasaun.

“Ita hatene katak kampaña ida ne’e hetan mós akompañamentu husi observadór internasionál sira entaun hakarak apela nafatin ba apoiante no joven sira tenke kuda metin nafatin espiritu unidade nasionál nune’e bele hamorin ita naran Timor-Leste ba mundu tomak”, afirma nia.

Nune’e husu atu ekipa susesu kandidatu prezidente sira labele hatun malu maibé ko’alia kona-ba dame nune’e fó inspirasaun no hakbi’it joven sira husi rezioaun konflitu sira atu sai nu’udar ajente ba mudansa iha sira-nia komunidade rasik.

“Foin lalais Komisaun Nasionál ba Eleisaun sira (CNE) realiza paktu eleisaun pasifiku no seremónia kultura ba kandidatura Prezidente Republika na’in-16 antes tama ba kampaña no eleisaun, entaun ho meius sira ne’e atu promove paz no unidade nasionál ba dezenvolvimentu nasaun Timor-Leste no prontu simu rezultadu eleisaun nian”, haktuir nia.

Kestiona kona-ba situasaun seguransa rai laran, nia dehan relatáriu ne’ebé nia simu situasaun iha teritóriu nasionál la’o hakmatek tanba komandu Polísia Nasionál Timor-Leste (PNTL) koloka ona efetivu rihun-haat-resin hodi asegura seguransa durante kampaña prezidensiál. (*)