“Sim, PNTL sei atua másimu ba funsionáriu sira ne'ebé mak uza patrimóniu estadu hodi Partisipa iha kampaña ne'e, no los duni ida ne'e ita tenke atua másimu”, dehan Komadante PNTL Munisípiu Dili, Superintendente Xefe Henrique da Costa, iha komandu Munisípiu Dili, tersa (01/02).

Nune'e servisu sira hanesan ne'e, PNTL serbisu hamutuk ho ajente sira, liliu Komisaun Anti Korrupsaun(KAK) hodi hala'o servisu ida ne'e ho di'ak liután.

“Tanba orientasaun kona-ba atuasaun sira ne'e mós, ita simu husi komandu ninia, liliu hodi haree ba situasaun sira ne'e”, dehan nia.

Aleinde ne'e, PNTL mós sei atua maka’as ba sidadaun sira ne'ebé uza atributu Grupu Arte Marsiál (GAM) hodi partisipa iha atividade kampaña eleisuan Prezidensiál.

“Nune'e ita sei la servisu mesak, ita sei servisu hamutuk ho Komisaun Reguladora Arte Marsiál sira nian (KRAM) hodi haree ba ida ne'e, tanba ita akompaña Arte Marsiál balun kompleta fali ona sira-nia dokumentu e hetan ona autorizasaun husi Governu, entaun ita sei haree hamutuk mós ba ida ne'e, nune'e bainhira ita atua buat ruma labele sees husi Lei”, dehan nia. (*)