Komadante Operasaun PNTL, Superentidente Xefe Pedro Belo hatete, Tanba PNTL prepara membru husi Unidade Espesiál Polísia (UEP), Unidade Patrolamentu Fronteira (UPF), Unidade Polísia Marítima (UPM) Sentru Formasaun Polísia (CFP), Komadu Munisípiu inklui Departamentu Justisa no Komandu Munisípiu Dili, ne’ebé sei asegura kampaña eleitorál iha loron 2 to’o 16 fulan-marsu.
“Ohin ita formatura jerál ikus nia, ho nia objetivu katak preparasaun PNTL nia durante ne'e mak loron ohin ikus ona, no hatudu ba povu Timor-Leste (TL) katak PNTL prontu ona hodi asegura seguransa iha kampaña eleitorál ne'ebé sei akontese iha bainrua (02/03), no eleisaun prezidensiál ne'ebé sei akontese iha dia 19 marsu”, dehan Pedro Belo, iha edifisiu UEP, Bairopite, segundu (28/02).
Nune'e loron 28 fevereiru sai loron ikus ona ba deslokasaun membru PNTL ba Munisípiu hothotu atu asegura kampaña eleitorál iha teritóriu Timor laran tomak.
Membru tomak ne'ebé mak iha PNTL, hamutuk rihun-4-resin ne’ebé sei hatun asegura atividade polítika, maibé kada munisípiu desloka membru hira, ne'e tékniku operasaun ne'ebé sei la fó sai.
“Atu desloka ema na’in-hira ba munisípiu ne'e parte tékniku operasaun ne'ebé sei la fó sai, maibé PNTL preparadu ona tuir planu de operasaun sei tun hotu iha loron ohin ba Munisípiu hothotu atu asegura seguransa iha ne'ebá”, dehan nia.
Maibé PNTL mós sei nafatin iha fatin ne'ebé deskonfia iha ameasa, ka tensaun politika hodi asegura nafatin, nune'e povu bele moris hakmatek atu labele sente tauk no iha violénsia nia laran. (*)