“To’o 27 fevereiru oras 21:30 kalan ita iha sumáriu relatóriu ba dezastre nian durante fulan-janeiru to'o fula-fevereiru dezastre ne'ebé mak akontese, ita-nia vítima sira mate hamutuk sanuru-resin-haat (14), nomós kanek ida”, informa Sekretáriu Estadu Protesaun Sivil (SEPS), Joaquim José Gusmão dos Reis Martins, hafoin hasoru malu ho PM Taur iha Rezidénsia Farol, segunda (28/02)
Ba sidadaun ne’ebé mate tanba dezastre natutrál iha Munisípiu Baukau na'in-6 tanba tinan foun iha asindente komunidade sira ba haris tasi no mout na'in-5, nomós ida mak mota lori to’o iha iis kotu.
Iha Bobonaro fulan-fevereiru nia laran iha mate na'in-4 ne'ebé hakur mota mak korente mota lori, Ermera na'in-1 ai baku, Manatuto na'in-1 nomós Oekussi rua ne'e hamutuk mate na'in-14 no kanek ida iha Baukau.
Ba inundasaun ne'ebé akontese iha domingu foin lalais ne'e, SEPS rejista ema hamutuk ne'ebé iha Sentru tempuráriu Dom Bosco hamutuk uma-ka’in ualunulu (80), no membru família hamutuk 294, SEPS servisu hamutuk ho amo sira durante loron tolu nia laran.
“Tuir ita-nia survey 72 oras ita fó asistensia hahán manas, matabixu, dader to'o kalan, komesa iha kurta-fera ita suplay ona hahan matak ida ne'ebé mak amo sira iha Dom Bosco mak organiza tein, nomós bele fó hán ba ita-nia komunidade ne'ebé afetadu agora iha sentru vokasaun”, esplika nia.
To'o iha horisehik SEPS hakarak halo fali avaliasaun ida, karik sira bele fila ona ba sira-nia fatin ne'ebé hela, SEPS bele prepara lori filafali sira ba hela sira-nia fatin ne'ebé sira hela ba.
Iha mós asesmen uma kain ne'ebé maka hetan estragus, liliu iha Dili, Postu Administrativu Dom Aleixo no Kristu Rei família afetadus hamutuk 128, no uma ne'ebé hetan estragu totál iha haat, aat naton iha tolu, aat kaman iha 6, 105 ne'ebé afetadu.
Dezastre naturál akontese iha munisípiu tomak, iha kategória tipu dezastre haat (4), anin sobu uma, ahi hán, inundasaun, nomós rai halai.
SEPS rejista anin sobu uma iha territóriu tomak munisípiu hotu iha totál família, iha uma ruanulu-resin-tolu (23), ahi hán haatnulu-resin-lima (45), no iha Dili 36, ba bee sa'e 201, boot liu mak iha Dili 125, rai halai haatnulu-resin-hitu (47), maka’as liu iha Ermera ho dadus 23 rai halai.
“Apoiu ba família ne'ebé mak hetan estragu atusrua-limanulu-resin-ida (251), atusrua-sanulu-resin-rua (212) mak hetan ona apoiu 125 iha prosesu atu fó apoiu ba sira”, dehan nia.
Nune'e Sekretáriu Estadu Protesaun Sivil deklara, SEPS sei la apoia vítima deszastre naturál ne'ebé Governu bandu la bele ba hela iha fatin risku, maibé kontinua hela nafatin. (*)
