Tempotimor (Díli) – Governu Timor-Leste fó ona konfiansa ba Ministru Obras Públiku atu lidera negosiasaun TL no Indonézia kona-ba oinsá TL bele fa'an ninia eletrisidade ba Timor Osidentál.
"Eletrisidade ne'ebé ita produz iha sentru eletrika Hera ho Betano, barak liu tiha ka superfull. Iha ita-nia estasun rua ne'e produz ona 50 Mw. Agora, ita-nia demanda eletrisidade ne'ebé ita uza 8 Mw. Ho ida ne'e iha 2004 liuhosi Memorandum of Understanding (MoU) entre EDTL, PLN no Banku Mundiál halo estudu viabilidade ne'ebé Governu Timor-Leste husu atu halo interkonesaun entre TL no Timor Osidentál," dehan Ministru Obras Públiku (MOP), Salvador Pires iha Palásiu Governu, Kuarta (14/08/2019).
MOP afirma, bainhira aprezenta estudu refere ba Konsellu Ministru (KM), iha posibilidade sei iha interkonesaun eletrisidade TL-Indonesia.
"Estudu ne'e, ohin aprezenta nia rezultadu ne'ebé hatudu katak iha posibilidade duni. Ekonomikamente no tenknikamente iha viabilidade atu halo interligasaun ne'e sei di'ak. Tanba iha Indonesia, sira nian demanda ba eletrisidade sa'e. Signifika sira tenke halo investimentu ho kapitál boot hodi harii fali sentru eletrisidade foun," tenik MOP.
Nia dehan, TL iha sentru rua ne'e superfull. Ne'ebé, TL bele fa'an ba Timor Osidental para lori retornu ekonomika mai TL. Tanba ne'e, KM fó ona kompetensi ba MOP hodi hahú iha negosiasaun ona.