Serveza Illegal Invade TL, Heineken Halerik - Horta Ejize Featured

Konteintores sira iha portu Dili Konteintores sira iha portu Dili Foto especial
Tempotimor (Dili) – Kompañia internasional HEINEKEN oras ne’e preokupa maka’as kona – bá sirkulasaun no movimentu serveza illegal sira iha Timor – Leste. Nune’e HEINEKEN hato’o ona pedidu eskrita ba governu hodi halo atuasaun no intervensaun ba problema ne’e. 
Diretor kompañia internasional HEINEKEN, Vinay Mathur hatete, durante ne’e HEINEKEN preokupa maka’as kona – bá movimentu serveza illegal sira iha rai laran. 
 
Nia konta hikas, saida mak akontese durante tinan rua ikus mak serveze sira mai hosi rai liur kontein alkoliku 12% to’o 20%, ne'ebe sirkula kuaje dala ha’at, no serveza sira ne’e perigu tebes ba sosiedade.
 
“Ami preokupa tebes ba situasaun ne’e, tanba . . . ami bele halo serveza ho nia alcohol hosi 10% to’o 20%, ami bele halo, fasil hela, maibé ami sei nunka halo serveza sira ne’e, tanba ami hatene katak ida ne’e sei oho sosiedade,” hatete Vinay ba Tempotimor.com iha Timor Plaza foin lalais.  
 
“Ba agora, ami nia negósiu sofre hela, tanba sirkulasaun serveza sira ne’e iha Dili”. Ami hakarak governu bandu serveza sira ne’e hotu ne’ebé kontein alcohol barak liu,” nia sujere. 
Nia esplika, situasaun ne’e hahu mosu iha tinan 2016 to’o 2017. 
 
“Durante periodu tinan rua kotuk, ekonómia la di’ak. Mosu redusaun itoan iha ekonómia lokal no ida ne’e afeta ba ami nia produsaun,” nia esplika. 
 
Entretantu, iha parte seluk eis Prezidente-Repúblika, José Ramos Horta mós preokupa tebes ba kestaun ne’e, no laureadu nobel ba paz 1996 ne’e ezije ba Ministériu Finansa atu aplika multa todan ba komersiu bir illegal ne’e.
 
“Serveja falsu tama iha TL ho alkol to’o 20 graus. Ministeriu Finansas tenki tau multa todan ba komersiu ilegal sira ne. Kompañia Heineken TL tenki iha apoiu hosi Governu TL para proteze ita nia industria,”hakerek Horta liuhosi nia Fan Page José Ramos-Horta iha loron Sesta, (2/08). 
 
Kona – bá kestaun ne’e, Ministru Koordenadór ba Assuntu Ekonómiku Interinu atual Ministru ba Reforma Legislativa no Assuntu Parlamentar, Fidelis Manuel Leite Magalhães rekoñese katak nia simu ona informasaun kompletu hosi parte HEINEKEN kona – bá sirkulasaun serveza illegal sira iha rai laran, no promete katak sei koordena ho instituisaun relevante sira hodi rezolve kestaun ne’e iha tempu badak.
 
Tuir portal governu nian katak, governu Timor-Leste asina ona iha loron 8, fulan-janeiru, iha Ministériu Negósius Estranjeirus no Koperasaun, akordu formál ida kona-ba investimentu ho Heineken Asia Pacific. Heineken hakarak atu, iha tinan ida ne’e nia laran, hahú harii fábrika ida iha besik Dili, ne’ebé sei fabrika bebida oin-oin, inklui serveja, refrijerante no bee. Projetu ne’e prevee ona atu bele funsiona iha tinan rua mai nia laran, sei harii postu servisu diretu nian hamutuk 200 no postu servisu indiretu nian hamutuk 800.
Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com