"Bee-moos susar tebes. Agora Oekusi distribui bee-moos loron-loron ne'e husi litru 50.000 ba leten, semana rua liubá to'o litru 200.000," dehan Prezidente RAEOA, Arsenio Bano, hafoin partisipa reuniaun Konsellu Ministru, iha Palásiu Governu, Kuarta (23/9).
Nia akresenta, atu distribui bee de'it, autoridade RAEOA tenke aluga karreta Bombeiros neen no rua husi autoridade nian.
Tanba ne'e, Arsenio hateten, iha orsamentu 2020 nian, sei halo perfurasaun boot iha fatin hanesan Oesilo, Pasabe, Pante Makasar ida-ida no Nitibe de'it maka rua, nune'e distribui ba eskola, postu saúde inklui komunidade.
"Perfurasaun bee liman ne'e besik tokon US$ 3, inklui sosa karreta tanke ba sub-rejionál sira," dehan Arsénio.
Entretantu, Arsénio hateten, total populasaun ne'ebé seidauk asesu ba bee-moos iha Oekusi besik ema 30.000. Nune'e, autoridade aprezenta proposta atu propurasaun ba bee, inkluk halo tanke bee rezerva husi enxe bee litru rihun 100 to'o rihun 200. (*)