Tempotimor (Dili) – Previzaun VIII governu atu hasa'e Kresimentu Ekonomia bele atinje %7.2 iha tinan 2020, tuir bankada KHUNTO iha Parlamentu Nasionál nu'udar tarjetu ambisiozu governu nian.

"Kresimentu Ekonómiku tuir governu nia tarjeitu, ita bele alkansa. Maibé, presiza servisu maka'as. Previzaun ne'e, ita labele ambisiozu demais. Maibé, ita tenke halo. Tanba ita tau tarjetu ida kresimentu ekonomiku sa'e ba %7.2 ne'e kuandu orsamentu aprova ona iha fulan ida ne'e," hatete Xefi Bankada KHUNTO, António Nobre iha PN, Kuarta (04/12/19).

Tuir Nobre, defisíl uitoan atu kresimentu ekonomiku bele atinje %7.2. Tanba, iha inisiu 2020 sei uza orsamentu duadesimál.

Alende ne'e, tuir deputada Fernanda Lay, governu bele ambisaun halo previzaun ba kresimentu ekonomiku nian, maibé bele ka lae? Tanba referensia barak ona.

"Governu bele iha ambisaun para propoin tau nia orsamentu. Maibé, PN bele fó lembra katak husi 2017 to'o inisiu 2019, governu la'o ho duadesimál. Tanba ne'e, ita nia kresimentu ekonomiku monu. Entaun atu rekopera filafali, tenke ho neneik. La'ós tau dala ida de'it. Tanba ne'e, governu bele propoin. Maibé, urjente ka lae? Sei la'ós urjente, tinan oin ita sei iha para hala'o," tenik Fernanda.

Tempotimor (Dili) – Primeiru Ministru (PM) Taur Matan Ruak promete sei aprezenta filafali Orsamentu Jerál Estadu (OJE) 2020 ba Parlamentu Nasionál iha 13 Dezembru 2019. Promesa ne'e PM Taur hato'o ba jornalista hafoin PM deside retira OJE 2020, husi Parlamentu Nasionál, Tersa (13/12/19) lokraik.

"Ami haree, bele hatama fali OJE 2020 iha loron 13 Dezembru semana oin. Signifika, iha loron 23 Dezembru 2019 ita bele remata debate OJE tinan fiskál 2020 nian," dehan PM Taur Matan Ruak husi meza Parlamentu Nasionál (PN).

Nia parte, PM dehan, sei diskute durante loron 13 nia laran, depois OJE 2020 sei tama filafali iha 13 Dezembru, para debate no remata iha loron 23 Dezembru.

Bankada CNRT liuhosi deputada Carmelita Moniz propoin ba PM atu aprezenta hikas OJE 2020 iha Janeiru 2020. Maibé, PM mantein nafatin ho loron 13 Dezembru.

"Hakarak fó hanoin de'it ba Primeiru Ministru katak, OJE 2020 ne'e bele aprezenta fali iha Janeiru 2020. Tanba, ita sei iha orsamentu 2019 nian. Ne'ebé, sei to'o iha fulan Marsu," propoin deputada CNRT Carmelita Moniz.

Tempotimor (Dili) – Ajenda plenária iha Parlamentu Nasionál (PN), Segunda (07/10/19) kansela. Tuir Vise II Prezidente Parlamentu Nasionál, Luis Roberto kanselamentu ne'e bazeia ba regulamentu PN nian artigu 5 (lima), kona-ba subtituisaun.

Iha regulamentu ne'e, Luis hatutan, bainhira deputada ida la prezensa iha PN loron tolu tutuir malu, presiza halo karta notifikasaun ida ba bankada rasik hodi subtitui deputada balun.

"Maibé Deputada Helena Martins Belo ho Lucia Taeki, ne'ebé halo hela viajen espesiál ba Italia ne'e ba hala'o servisu misaun PN nian. Tanba ne'e, la presiza subtitui. Se ita kada komisaun ida bainhira hetan viza hala'o viajen ba liur, hotu-hotu iha subtitui ne'e razaun oinsá? Hau konsidera subtitui ne'e hanesan eiru ida," hatete Luis Roberto iha PN, Segunda (07/10/19).

Vice Prezidente PN ne'e esplika, antes karta husi Komisaun F relasiona ho viajen deputada nain rua nian ne'e ba Italia, tama ona iha meza PN, Prezidente PN mós hatún ona despaixu pozitivu iha dia 19 setembru, katak deputada nain rua ba hala'o enkontru ida iha Italia. Ida ne'e, luis dehan, hanesan hala'o misaun PN nian.

"Ho razaun hirak ne'e, mak ohin kansela plenaria ba loron ohin. Se la kansela ou suspensaun ba plenária, signifika katak ohin ne'e lidera deputadu hamutuk 66," dehan Roberto.

Roberto dehan, nune'e meza nafatin mantein pozisaun bazeia ba regulamentu no estatutu deputadu sira nian iha artigu 9 alinea 1 katak kuandu deputada vizita espesiál ba rai liur, la presiza Subtitui.

Bazeia Ba Rejimentu

Entretantu, deputadu Francisco Miranda Branco hatete subtitui temporaria ba Deputada Ilda Maria da conceição hodi servisu temporaria ba Deputada Cidalia Mesquita Ximenes nia fatin no subtitui temporariu ba Deputada Rosela da Costa hodi servisu temporaria ba Deputada Helena Martins Belo nia fatin.

"Subtituisaun ne'ebe mak ami halo ne'e, bazeia ba estatuta no rejimentu. La'ós liuhosi dalan maioria ou menoria. Tanba Deputada Helena Martins Belo ba hala'o estudu komparativu iha Italia," dehan Vise Prezidente Bankada FRETILIN, Francisco Miranda Branco iha PN, Segunda (07/10/19).

Nia dehan, subtituisaun ba deputada la viola regra ruma. Tanba, antes ne'e desizaun husi meza mós iha ona konkordansia. Maibé, mai fali iha plenaria mak kestiona.

Nia afirma, relasiona ho subtituisaun ne'ebé iha, la'ós atu aumenta númeru deputada. Tanba, tuir Branco, deputadu nafatin mantein 65 la iha mudansa ba numeru deputadu.

Subtituisaun ida ne'e, Branco hatete, tuir servisu polítika Parlamentu nian, bele hala'o servisu iha liur. Maibé, nia votus prevalese nafatin labele lakon tenke iha votus nafatin. Tan ne'e, halo subtituisaun.

"Estatutu fó dalan atu subtitui ida hala'o servisu polítiku nian iha rai liur. No ida subtitui tanba presiza iha direitu ba votus,” tenik Branco.  

Tempotimor (Dili) – Bankada Congresu Nasionál Rekonstrusaun Timorense (CNRT) iha ona pontu ida atu haree kona-ba Orsamentu Jerál Estadu (OJE) tinan fiskál 2020 nian, razoabilidade ba povu no nasaun. Tanba ne'e, iha prosesu diskusaun no debate mak sei esplika.

"OJE tinan fiskál 2020 nian ne'ebé governu lori mai billaun $1.950 ne'e depende ba dinámika debate nian. Tanba, antes ne'e CNRT dehan atu redúz OJE 2020 husi billaun $1.950 ba billaun $1,3. Ida ne'e diskusaun liu ona. Maibé, ita haree oinsá mak orsamentu bele razoavél," dehan deputadu CNRT, Patrocino dos Reis iha Parlamentu Nasionál (PN), Sesta (29/11/19)

Deputadu ne'e afirma, orsamentu ne'ebé iha importante razoavél no liga ba kapasidade ezekusaun governu nian, liga interese povu nian no funsionamentu mákina do estadu. Tanba ne'e, tenke razoavél. Tanba ein prinsípiu orsamentu ne'e tenke di'ak ba estadu, nasaun no povu," subliña Patrocino.

Alende ne'e, jornalista sira konfirma deklarasaun CNRT nian kona-ba atu vota kontra OJE 2020 nian, maibé deputadu Patrocino dos Reis dehan katak, iha prosesu debate mak haree.

Tempotimor (Dili) – Deklarasaun Primeiru Ministru (PM) Taur Matan Ruak katak nia prontu atu hasoru Eleisaun Antesipada (EA), konvida opiniaun oioin husi deputadu iha Parlamentu Nasionál (PN).

“Eleisaun Antesipada? Ami (CNRT) ne'e esperensia tiha ona. Estetementu ne'e Primeiru Ministru mak halo. Intensaun saida? Ite boot sira husu ba Primeiru Ministru. Ne'ebé, ba CNRT di'ak hela,” hatete Prezidente Bankada CNRT, Duarte Nunes iha Parlamentu Nasionál, Kuarta (23/10/19).

Iha sorin balun, Deputadu KHUNTO António Verdial katak atu ba fali eleisaun antisipada, di'ak liu lee filafali Konstituisaun RDTL.

"Estatementu balun ne'ebé hakarak Eleisaun Antesipada, ha'u atu hatete katak, di'ak liu ita lee no haree konstituisaun, hala'o servisu tuir Konstituisaun Repúblika Demokrátika Timor-Leste (K-RDTL), haruka,"  dehan Verdial.

Tempotimor (Dili) – Konsellu Diretiva-Aliansa Mudansa ba Progresu (KD-AMP), seidauk iha hanoin atu ba Eleisaun Antesipada (EA), bainhira polémika membru Governu na'in 9, seidauk rezolve.  

“Deklarasaun Primeiru Ministru Taur Matan Ruak kona-ba ida ne'e, dala ruma faze ida atu hatán de'it ba deklarasaun KHUNTO iha Parlamentu Nasionál. Tanba, AMP seidauk iha diskusaun, seidauk tuur hamutuk hodi hanoin problema to'o boot, hanesan Eleisaun Antesipada,” hatete Deputadu CNRT, Duarte Nunes iha Parlamentu Nasionál, Tersa (22/10/19).

Molok ne'e, remata hasoru malu ho Prezidente Repúblika iha Palásiu  Prezidensiál, Bairru-Pite, Dili, Tersa, PM Taur Matan Ruak ba jornalista katak, nia prontu atu ba Eleisaun Antesipada, bainhira polémika kona-ba membru Governu na'in 9 labele rezolve.

Duarte hatete, AMP seidauk iha hanoin to'o iha Eleisaun Antesipada. Maibé, nia dehan, AMP tenta atu rezolve polémika membru Governu na'in 9, ne'ebé la hetan pose husi Prezidente Repúblika.

"Ami AMP seidauk ko'alia, ami iha ona intensaun atu haree took problema ne'ebé sira ezije ne'e to'o iha ne'ebé. Karik, loron ida ami mós bele hola desizaun hamutuk. Karik iha intensaun hamutuk, para atu hato'o lista foun karik. Ami bele ko'alia para PM bele hato'o lista foun," dehan Duarte.

Nia dehan, AMP sei hola desizaun ba deklarasaun deputadu KHUNTO nian, ne'ebé provoka PM hasai deklarasaun kona-ba Eleisaun Antesipada.

"Tanba iha bankada, ida ne'ebé ami hakarak, ami bele hato'o. Ne'ebé, ami sei tenta ko'alia desizaun saida mak ami hola kona-ba deklarasaun deputada Olinda Guterres nian, depois PM hasai estatementu ida ne'e. Ne'ebé, ida ne'e sei parsiál husi AMP, seidauk anivél AMP," deputadu ne'e afirma.

Tempotimor (Dili) – Deputadu opozisaun iha Parlamentu Nasionál husu ba Governu daualu ne’ebé lidera husi Primeiru Ministru Taur Matan Ruak, atu hatudu rezultadu serbisu loron 100.

Deputadu husi Bankada FRETILIN, Dario Madeira sisi promesa Governu bainhira simu pose katak sei halo esforsu hotu-hotu iha loron 100, hodi hatudu rezultadu ba povu Timor-Leste.

“Ha’u reprezenta (povu) iha Parlamentu Nasionál ida ne'e, hakarak atu ko'alia tanba tempu mós besik ona. Orsamentu ba tinan 2020 atu mai ona PN, atu tama ba diskusaun,” Dario deklara iha PN, Tersa (15/10/2019).

Hanesan deputadu ne’ebé durante ne’e tuun ba hala’o kontaktu eleitorál iha baze, Dario hatete, nia sempre simu pergunta barak kona-ba kestaun ne’e.

Tanba ne’e, nia dehan, nu’udar reprezentante povu, nia iha obrigasaun ida atu husu tutan ba Governu kona-ba promesa ne’ebé halo ona.

“Hahú formasaun Governu (VIII) Señor Ministru sempre koalia katak “ami sei halo esforsu hotu-hotu iha 100 dias ami sei hatudu rezultadu,” dehan Dario hodi repete promesa ne’ebé Governu fó.

Maibé, nia hatutan, ohin loron povu husu rezultadu serbisu loron 100 mak ne’ebé?.

“Halo favor hatudu ba votante sira par sira mós bele hatene ida ne'e,” dehan nia.

Deputadu ne’e dehan, promesa ba loron 100 ne’ebé Governu AMP fó to’o ohin loron prejudika nafatin povu, liuliu iha área  Saúde, Bee-moos, Agrikultura, no Infraestrutura.

“Área hirak ne’e iha baze sei nafatin sai problema,” dehan nia.

Tempotimor (Dili) – Deputada CNRT iha Parlamentu Nasional (PN), Virginia Ana Belo ameasa vota kontra Orsamentu Jerál Estadu (OJE) 2020, bainhira livru Panorama Orsamentál 2020  la tuir estrutura no aumentu laiha balansu.

"Ita boot sira iha esperiénsia naruk. Liuliu maluk tékniku sira. Maibé, ha'u fó de'it ezemplu ida iha transferénsia públika. Orsamentu atu halo eskola no orsamentu atu konstrui klínika. Halo nusa mak ba tau fali iha transferénsia públika?" husu Prezidente Komisaun D, Virginia Ana Belo iha plenária PN, Segunda (04/11/19).

"Sosa ró-ahi versu II tau fali iha bens no servisu. Saida mak ne'e señora ministra? Ha'u bilán tiha de'it kuandu haree livru orsamentu ida ne'e. Buat hotu ida loloos, iha kapitál menor no kapitál  dezenvolvimentu mós mai fali iha transferénsia públiku.  Tanba ne'e, osan sira ne'e presiza muda ba nia fatin. Se la muda, ha'u nia pozisaun mak vota kontra," dehan Virginia.

Nia afirma, deputadu hotu-hotu iha ninia pozisaun. Tan ne'e, nia hakarak hateten katak ne'e fora husi orientasoens. Ida ne'e, ninia deklarasaun privadu.

“Sei kolokasaun orsamentu ida sabraut ida hanesan ne'e, ha'u nia pozisaun mak hanesan ohin ha'u dehan, sei vota kontra orsamentu liuliu iha ministériu finansas," nia dehan.

Nia hatete, nu'udar deputada nia apoiu ba Governu. Tan ne'e, sei nia mesak mak vota kontra laiha impaktu. Tanba, tuir Prezidente Komisaun D ne'e, iha deputadu no deputada barak mak sei apoiu ba Governu.

"Ha'u mesak mak vota kontra laiha impaktu. Kolega deputadu barak mak apoiu ba Governu. Ne'ebé laiha impaktu," nia dehan.

Tempotimor (Dili) – Deputadu Partidu Libertasaun Populár (PLP), Sabino Soares ‘Guntur’ husu Governu atu hadi'a sistema ezekusaun Orsamentu Jerál Estadu (OJE) nian. Tanba, tuir deputadu ne’e, Membru Governu (MG) barak, mak kapasidade lato'o atu ezekuta OJE.

"Ezekusaun tinan 2019 ne'ebé boot ba daudauk ne'e, tanba sistema mak obriga. Tanba la'ós la'o tuir ema nia kapasidade. Maibé, tanba sistema mak obriga katak tenke ezekuta hotu, maske kapasidade la to'o iha ne'ebá. Entaun, to'o ona tempu tinan nia rohan ita foin haree katak osan ne'e fakar ba iha ne'ebé, ita mós la hatene," dehan deputadu Guntur iha PN, Segunda (11/11/19).

Nia dehan, maske iha audiénsia AMP nia, propoint ona atu hadi'a sistema refere, maibé parte barak mak lakohi.

"Momentu ida ami audiénsia. Ha'u dehan, sistema ida kona-ba ezekusaun ba kuantidade orsamentu ba pursentu ne'e hadi'a, para bele ezekuta tuir ema nia kapasidade ka kbi'it, para bainhira la konsege ezekuta hotu, ne'e fila ba kofre estadu," tenik Guntur.

Nia realsa, bainhira Governu lakohi muda sistema ne'e, mak kada tinan fakar osan de'it. Tanba nia ezekusaun la klaru no duni tuir de'it pursentu boot.

Tempotimor (Dili) – Vise Prezidente Bankada CNRT iha Parlamentu Nasionál (PN), Partrocino dos Reis klarifika katak planu remodelasaun nia fukun mak membru VIII Governu inkompletu.

"Konferénsia remodelasaun ne'e hanesan rezolusaun ida ne'ebé tau iha konferénsia AMP nian. Maibé, seidauk deskute kle'an," dehan Patrocino, Tersa (19/11/19) iha resintu PN.

Nia afirma, remodelasaun sei la haree ba tempu. Maibé, remodelasaun mós parte ida husi avaliasaun ba servisu membru Governu nian.

"Remodelasaun ne'e la depende ba tempu. Maibé, haree ba rezultadu servisu. Atinje ka lae, buat sira ne'ebé ita halo. Remodelasaun ne'e, parte ida husi avaliasaun ba servisu Governu nian," Patrocino afirma.

Remodelasaun, nia dehan, foka liu ba postura Governu ne'ebé to'o ohin loron sei nafatin mamuk. Ida ne'e, tuir Patrocino, sei implika maka'as ba iha ezekusaun orsamentu. Liu-liu metas ne'ebé Governu define tuir nia programa ne'ebé atu lori povu ba moris di'ak nian," Partrocino salienta.

Page 1 of 2

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com