“Ha'u promete, bainhira eleitu ba Prezidente Repúblika, ha’u sei husik hela funsaun nu’udar Prezidente Partidu Democrátiku, hodi tau matan los de’it ba Povu”, hatete nia hafoin ofisialmente Anúnsia nia kandidatu Prezidente Repúblika iha Tasitolu, domingu (20/02).
Bainhira hetan konfiansa iha eleisaun loron 19 fulan-marsu tinan 2022, sei la’o ba knua sira, tur hamutuk ho inan-aman sira, ho maun no alin sira, ho inan no feton sira, hodi rona sira-nia preokupasaun, no hanoin ka aspirasaun sira.
"Maun alin Povo Doben Timor-Leste tomak, ba Prezidente Repúblika, ha’u sei lasai Prezidente ida Palásiu nian, ha'u sei sai Prezidente ida Povu nian”, dehan nia.
Tanba Palásiu Prezidente la'ós Palásiu Liurai nian, maibé Palásiu Povu nian, nune'e Palásiu Prezidente sei nakloke ba públiku, atu Prezidente Repúblika bele simu no rona povu nia lian, povu nia halerik no povu nia aspirasaun sira.
Maibé presiza halo Mudansa no transformasaun hahú agora, labele hein tan katak kontinua hanaruk impase politika, hanaruk odiu no vingansa, hanaruk fila kotuk ba malu, hanaruk fahe malu, hanaruk moris iha susar no ki'ak, no halai do’ok liután husi Konstituisaun RDTL.
Ho ida ne'e Prezidente Partidu Demokrátiku ne'e konvida povu tomak atu mai hamutuk ho PD, ho fuan no laran, vontade no domin ba Timor-Leste no hamutuk, muda politika iha Timor katak Timor ida ne’ebé hun ida, abut ida, Povu ida no Timor ida ne’ebé respeita ho los no lolos ba Konstituisaun RDTL. (*)