"Organizasaun Profesionál Saúde Militante Fretilin (PSMF) prontu atu esforsu lori vitória ba kandidatu Prezidente Francisco Guterres 'Lú Olo' iha eleisaun 19 marsu 2022," dehan Prezidente Komisaun Organizadora, Sekretáriu PSMF Baukau, Geremias Magalhães iha sentru konvensaun Baukau vila antiga, sabadu (19/02).
Tanba membru organizasaun PSMF iha Munisípiu Baukau hamutuk 377, enkuantu iha nivél nasionál rejistradu pur-volta rihun 3-resin.
"Ohin halo deklarasaun nivél nasionál nian, hanesan organizasaun militante Fretilin ninia lideransa diresaun komisaun dirativa nasionál mobiliza kuadru hotu husi Munisípiu 12 inklui Raeoa, Baukau sai uma na'in atu halo deklarasaun votus afirmasaun hodi fó konfiansa ba kandidatu Prezidente Francisco Guterres 'Lú Olo'," nia hatete
Nune'e, Koordenador Jerál PSMF, Luis Maria Freitas Ribeirro Lobato hatete, konferensia nasionál ba dala haat ne’e, ho hakbi'it husi estatutu PSMF no partidu Fretilin dever atu haforsa disiplina instituisionál deside pozisaun PSMF nian ba kandidatu Prezidente Repúblika iha eleisaun Prezidensiál.
"Mak fó apoiu tomak ba kandidatu Prezidente Repúblika kamarada Francisco Guterres "Lú Olo" ordem polítika ne'e obrigatóriu ba PSMF husi Nasionál, Rejionál, Munisípal Instituisaun sira no Postu Administrativu, Suku no Aldeia sira," nia hatete
Tanba ne'e, estrutura PSFM iha 12 Munisípiu inklui Raeoa ne'ebé estabelese ona iha periodu 2 liu ba integra aan iha servisu komisaun polítika Munisípiu sira nian, hodi re-ajusta no konsolida apoiu tomak programa komisaun polítika Rejionál no komisaun polítika Munisípal.
Polítika husi PSMF ba estrutura Munisípiu sira tenke sinerjia ho orientasaun lideransa partidu nian iha ida-ida nia Munisípiu durante pre-kampaña eleisaun no post eleisaun hodi garante susesu vitória ba kandidatu Fretilin. (*)