LAMEGUA – Partidu Alliansa Mudansa ba Progresu (AMP) ne’ebé kompostu hosi partidu tolu, partidu CNRT, PLP, no KHUNTO kontinua hametin (konsolida) a’an iha baze, liliu iha suku Bahu, Baukau.

Konsolidasaun ne’ebé hala’o iha loron Sabadu, 7 Abril 2018, marka prezensa hosi koordenador AMP nian, no iha tempu hanesan mós ko’a vita ba sede suku Lamegua nian. Liu tiha ida ne’e, estrutura hamutuk ho militante no simpatizante AMP nian hakat fali ba sede AMP nian hodi hahu sira nia atividade konsolidasaun nian.

Koordenador mazimu partidu KHUNTO munisipiu Baukau, Angelo Angelito Freitas Correia katak iha tinan 2017 ema so’e tiha Kay Rala Xanana Gusmão no Taur Matan Ruak ba kotuk.

“Ita nia aman nain rua ema so’e tiha ba kotuk. Nu’udar oan ami hare sira iha kotuk. Nune’e ami hare sira iha kotuk, ami fila ba kotuk foti no tane sira nain rua hodi sira nain rua bele tane Timor – Leste ba iha komunidade internasional,” hatete koodernador KHUNTO Baukau, Angelo liuhosi nia diskursu iha konsolidasaun AMP nian iha postu administrativu Baukau villa, Suku Bahu, Aldeia Lamegua, Sabadu (07/04).

Koordenador Angelo kontinua husu ba juventude sira atu kontinua hametin paz no estabilidade iha Baukau hodi labele kria instabilidade.

Estrutura partidu KHUNTO nian katak, militante no simpatizante tomak fó apoiu ba AMP hodi tane Xanana Gusmão no Taur Matan Ruak iha Timor – Leste no iha mundu internasional.

Vise Prezidente CNRT Baukau, Iku Lay hatete, hahu uluk manas atu luta hasoru invazaun Indonézia. Ohin ita hamanas tan dala ida atu fó vitoria ba AMP iha eleisaun antisipada ne’ebé sei akontese iha loron 12 Maio 2018.

“Lalika dúvida atu vota AMP, tanba imposivel Kay Rala Xanana Gusmão, Taur Matan Ruak, no Naimori atu lori nasaun ne’e ba rai kuak,” nia hatete.

Vise prezidente Komisariu Politika Nasional PLP, Guntur husu ba militante no simpatizante sira atu vota ba ema sira ne’ebé durante tinan barak moris hamutuk ho povu, no terus hamutuk ho povu.