BEKORA – Prezidente Alliansa Mudansa ba Progresu (AMP), Kay Rala Xanana Gusmão hatete, Estadu Direitu Demokrátiku iha Timor – Leste kompostu hosi airin ha’at, maibé ain sorin "malahuk ona", no governu mós la’o "ain kleuk ona".

Xanana hatutan, prosesu politika agora determinante tebes, tanba ne’e nia husu ba militante no simpatizante AMP nian tomak tenke partisipasa iha loron eleisaun ne’ebé sei akontese iha loron 12 Maio 2018 hodi bele hametin Estadu.

“Parlamentu Nasioná agora libur (feriadu). Ita atu ba konsulta lei ruma, seguransa sira taka metin odamatan. Estadu agora nia ain sorin lahuk tiha ona. Ai – rin ida seluk kleuk a’at liu mak mak governu. Governu agora la halo buat ida,” hatete Xanana liuhosi nia diskursu iha konsolidasaun AMP iha Terminal Bekora, Dili, Domingo (8/04).

“Governu agora fulan 8 de’it uja no sa’e kareta Estadu ba halo fali kampaña no trata de’it AMP,” hatutan Xanana.

Tanba ne’e, Xanana husu ba militante no simpatizante AMP nian tenke vota ba AMP iha númeru 8 hodi hametin Estadu, atu nune’e bele halo dezenvolvimentu di’ak liutan ba povu.

Iha fatin hanesan, porta voz AMP atual prezidente Partidu Libertasaun Popular (PLP), Taur Matan Ruak hatete, durante ne’e ema sempre dehan AMP mak sala hela de’it.

“AMP la sala ida. FRETILIN mak sala, no sala hela de’it,” hatete Matan Ruak.

“Apa ba hamoos to’o ta’a kanek nia liman, depois dehan Ama mak sala fali. Ne’e laloos ida,” hatutan Matan Ruak.

Entretantu, Xanana haforsa tan Matan Ruak katak, partidu CNRT foin moris iha tinan 2007, PLP no KHUNTO foin moris iha tinan 2017. Tanba ne’e, Xanana afirma situasaun impase politika ne’ebé akontese iha rai laran, la’ós AMP nia kulpa, tanba partidu tolu ne’e sira la halo konstituisaun.

“FRETILIN mak halo konstituisaun. Regra konstituisaun hatete momoos katak minoria tenke hakruk ba maioria,” haforsa Xanana.

Entretantu, durante ne’e parte partidu FRETILIN sempre deklara ba públiku katak, situasaun politika ne’ebé akontese iha rai laran, tanba AMP nia hahalok. No Ministru Defeza no Seguransa, Agustinho Sequeira “Somotxo” antes ne’e mós hatete, kuandu problema ruma mosu iha rai laran, nia husu ba PNTL no F – FDTL labele sai, no husu ba deputadu opozisaun hamutuk nain 35 mak rezolve, maibé deklarasaun ne’e hetan kedas intervensaun hosi komandante jeral PNTL, Komisariu Julio Hornai katak, polisia sei atual kualker problema bainhira mosu iha rai laran.

La’ós ne’e de’it, primeiru – ministru, Mari Alkatiri mós konsidera asaun bloku opozisaun iha Parlamentu Nasionál nu’udar golpista bainhira rejeita nia programa no orsamentu rektifikativu iha tinan kotuk (Oki)