"Prezidente Repúblika, Francisco Guterres Lú Olo, ohin, 27 janeiru, prezide  reuniaun Konsellu Superior Defeza no Seguransa hodi ko’alia kona-ba desizaun Konsellu Ministru nian relasiona ho ezonerasaun, nomeasaun no promosaun ba altas xefias FALINTIL-Forsas Defeza Timor-Leste (F-FDTL)", dehan Komunikadu Imprensa ne'ebé www.tempotimor.com asesu iha pájina ofisiál Prezidente Repúblika, kinta (27/01).

Iha reuniaun ne’e, Prezidente Repúblika sei rona opiniaun sira husi membru Konsellu Superior Defeza no Seguransa kona-ba desizaun Konsellu Ministru nian iha 21 janeiru hodi ezonera Tenente Jenerál Lere Anan Timur, ezonera Majór-Jenerál Falur Rate Laek husi kargu Vise-Xefe Estadu-Maiór-Jeneral, nomeasaun Majór-Jenerál Falur Rate Laek ba kargu Xefe Estadu-Maiór Jenerál Forsas Armadas, nomeasaun Brigadeiru Jenerál Calisto dos Santos Coliati ba kargu Vise-Xefe-Estadu-Maiór Jenerál Forsas Armadas no mantein nomeasaun Komodoru Pedro Klamar Fuik ba kargu Xefe Estadu Maiór Forsas Armadas.

Antes ne'e, Xefe Estadu Maior Jenerál Lere Anan Timur, iha enkontru regular ho Prezidente Repúblika hatete, Konsellu Superior Defeza no Seguransa sei reune hodi ko’alia kona-ba ezonerasaun no nomeasaun ba pozisaun sira ne’ebé deside iha Konsellu Ministru.

“Aban mak haree kona-ba ha’u-nia reforma ka ha’u-nia rezignasaun ga?. Nomeasaun ka ezonerasaun, hothotu kompeténsia Prezidente da Repúblika nian. Nia tenke liuhusi mekanizmu, to’o ha’u-nia ezonerasaun, nomeasaun foun, prosesu ida ke naruk. Prosesu naruk ne’e la’o hotu ona. Konsellu Superior Militar, Konsellu Ministrus, deliberasaun Konsellu Ministru ninian, mai to’o Prezidente, Prezidente nia meja. Prezidente Repúblika, hanesan ha’u hatete, nia kompeténsia ezonera i nomea altas xefias, mais ultimu mak Konsellu Superior Defeza no Seguransa. Aban, Nia (Prezidente Repúblika) reuniaun ho Konsellu Superior Defeza no Seguransa mak diskute kona-ba ezonera se, nomea se? Ha’u-nia rezignasaun ka ha’u-nia reforma ga, aban mak haree iha ne’ebá", dehan Lere iha hafoin hasoru malu ho PR Lú Olo iha Palasíu Prezidensiál Bairopite, kuarta (26/01).

Posesu ba ezonerasaun husi kargu nu’udar Xefe Estadu Maior-Jenerál hahú husi Konsellu Superior Militár, Konsellu Ministrus no ba Prezidente Repúblika. Reuniaun Konsellu Superior Defeza no Seguransa nian sei fó hanoin sira ba Prezidente Repúblika atu foti desizaun. (*)