Sekretáriu Jerál Partidu Demokrátiku, António da Conseição "Kalohan" hatete, desizaun hamosu kandidatu rua ne'e bazeia ba rezultadu reuniaun Partidu Demokrátiku liuhusi nia orgaun konsellu Superior iha loron 6 no 7, fulan-janeiru tinan 2022 ne’ebé sei hamosu konvensaun nasional hodi deside kandidatu ida entre na’in-rua atu avansa sai Kandidatura nasionál iha eleisaun.

"Partidu Demokrátiku liuhusi nia orgaun Konsellu Superior iha reuniaun loron 6 no loron 7 fulan-janeiru simu disponibilidade kandidatu na'in-rua ne’ebé prontu atu kompete malu iha Partidu liuhusi Konvensaun Nasionál ne’ebé mak sei realiza iha dia 15 de Janeiru hodi sai nu’udar kandidatu nanionál”, dehan nia liuhusi konferensia inprensa iha sede Partidu Demokrátiku Kolmera, segunda (10/1).

Dadauk, Prezidente Repúblika iha loron 6 Janeiru  hahú hala’o konsultasaun ho partidu politiku hotu hodi rona opiniaun Partidu sira molok atu deside loron eleisaun ba Prezidente Repúblika ba períodu tinan 2022-2027.

Hodi ne'e, atu haburas no hametin demokrásia iha Timor-Leste mak Partidu Demokrátiku hakarak ofisialmente anunsia Partisipasaun Partidu Demokrátiku ho nia kandidatu preparadu atu konkore iha Eleisaun Prezidensiál.

"Kandidatu rua ne’e mak, Deputadu Parlamentu Nasionál Bankada Demokrátiku Eng. Mariano Assanami Sabino, Prezidente Partidu Demokrátiku, no Deputadu Parlamentu Nasional Bankada Partidu Demokrátiku Dr. Adriano do Nascimento, Prezidente Konsellu Politiku Nasionál Partidu Demokrátiku”, dehan nia.

Kandidatu PD na’in-rua ne’e sei hala'o sira-nia debate iha dia 15 de Janeiro hodi aprezenta siraania vizaun nu’udar Prezidente Repúblika ba partisipante Konvensaun Nasional hodi hili demokratikamente ida nu’udar Kandidatu Nasionál atu kompete ho kandidatu seluk iha elisaum prezidénsial 2022. (*)