Enkontru kortejia ne’e, ho objetivu hosi enkontru ne’e, atu hodi halo aprezentasaun kona-ba ezisténsia Ajénsia TIC TIMOR, vizaun no misaun Ajénsia nian nomós progresu servisu ne’ebé Ajénsia ne’e atinje ona inklui planu servisu ne’ebé sei halo relasiona ho Governu Eletróniku.

Diretór Ezekutivu TIC TIMOR I.P, Roberto Caitano de Sousa Vicente informa, Ajénsia TIC TIMOR hari’i tinan 2017 bazeia ba dekretu lei númeru 29/2017 iha tempu ne’ebá tutela ba Primeiru-Ministru maibé hafoin dekretu lei orgánika númeru 46/ 2023 tutela fali ba Ministériu Transporte no Komunikasaun (MTK).

Nia esplika ajénsia ne’e ho nia karater hanesan Institutu Públiku ho estatutu hanesan autonomia iha nia ativasaun automia finanseira no aprovizionamentu rasik.

Bainhira hahú hamosu kedas planu estratéjiku hosi 2017 to’o 2030 hahú hosi 2017 hahú ho definisaun ba polítika sira ba ICT (Information and Communications Technology) nian, planu mestre ba ICT no haree ba padraun tékniku ba estadu.

Nune’e iha tinan 2017 enfrenta problema polítiku nune’e, la konsege implementa polítika refere no muda hotu mai iha tinan 2018 to’o 2022.

Haree ba dezenvolvimentu infraestrutura importante iha TIC nian hanesan rede Governu nian, sentru dadus Governu Eletróniku, iha mós projetu foun ne’ebé TIC TIMOR sai mós hanesan komisaun tékniku ba projetu Kabu Submariñu. Projetu ida kona-ba Identifikadór Úniku ida foun ne’ebé agora dadauk TIC TIMOR halo maka hanesan Timor Dijitál 2023-2032.

TIC TIMOR mós haree kona-ba dezenvolvimentu sistema aplikasaun importante sira, dezenvovimentu ba hosting web Governu nian, dezenvolvimentu portál Úniku halo fali estudu kona-ba sistema sira ne’ebé iha instituisaun estadu sira atu mellora liu tan sistema sira.

Ajénsia ne’e mós produz ona revizaun kona-ba ICT policy no submete tiha ona prezidénsia Konsellu Ministru iha 2021 no sei submete ba Konsellu Ministru atu halo aprovasaun tanba ida ne’e bazeia ba rezolusaun de’it no polítika ida ne’e kaduka ona iha tinan 2019 entaun presiza atu halo fila fali revizaun tanba iha aspetu barak maka temi iha laran.

“Kona-ba implementasaun Timor Dijitál to’o 2032 tenta atu dijitaliza servisu tomak iha instituisaun estadu, fornese plataforma online”, hatete Diretór Ezekutivu TIC.

Ho servisu sira ne’e, konsege finaliza ona ezbosu lei kona-ba Protesaun Dadus no Privasidade, lei kona-ba Propriedade Intelektual iha prosesu atu finaliza, lei Komérsiu Eletróniku, Diretu de Autor ne’ebé promulga ona hosi Prezidente Repúblika iha tinan 2022. TIC TIMOR mós konklui ona ezbosu lei kona-ba lei Sibernétika no iha ona estratejia siberseguransa ninian.

“Faze 2023 to’o iha 2025 haree liu ba dezenvolvimentu kapital umanu nian hodi haree ba jesatun projetu sira, haree ba frame work instituisaun sira no seluk tan. Haree mós formasaun edukasaun ba IT sira no presesu ne’e hahú kedas iha tinan 2021 no halo sosializasaun ba atividade ne’ebé TIC TIMOR halo. To’o 2025 mehi mós katak kompleta ona rejistrasaun sistema identifikadór úniku”, dehan nia.

Iha fatin hanesan II Vise-Primeiru-Ministru Sr. Mariano Assanami Sabino hatete, ne’e hanesan previleziu ida tanba TIC TIMOR bele fahe informasaun ba iha gabinete Vise- PM hodi bele hatene no bele tuir mós saida maka atu halo ba oin.

Bainhira iha posibilidade ekipa bele halo mós aprezentasaun iha reuniaun Konsellu Ministru atu nune'e governante sira mós hatene kona-ba servisu ne'ebé TIC TIMOR halo ona.

Enkontru ne’e partispa mós husi Diretór Diresaun Dezenvolvimentu Sistema Informasaun no Aplikasaun (DDSIA)-Justo Ferandes, Diretór Diresaun Servisu Infraestrutura-André Flix Marques, Diretór Diresaun Identifikadór Úniku-Florindo Guterres da Costa nomós Koordenadora Timor Dijitál-Sonia Leite hodi halo aprezentasaun kona-ba servisu kada diresaun ne’ebé tutela iha TIC TIMOR. (*)